"Eguraldi ona edo txarra egin, bertan izaten gara, azken korrikalariaren zain"

IRUTXULOKO HITZAk Behobia-Donostiako pirata elkarrizketatu du; lasterketari buruzko gehigarri berezian argitaratuko du.

Irutxuloko Hitza

2015/11/02

Jaime Alzugarai.

Behobia-Donostia lasterketari buruzko gehigarri berezian pertsonaia berezi bat elkarrizketatu du IRUTXULOKO HITZAk. Hamar urtez probako korrikalariak animatzen daraman piratarekin hitz egin du: Jaime Alzugarai egiatarra. Korrikalari zein ikusle izanik noizbait ikusiko zenuten ibilbidean zehar. Ostiral honetako astekarian elkarrizketa argitaratuko du, proban bizitako pasadizo onenekin. Hamasei orrialdeko gehigarri berezia prestatu du Irutxuloko Hitzak ostiral honetarako. Oarso Bidasoko Hitzarekin batera osatu du zenbaki berezia, bien artean Bidasoa, Oarsoaldea eta Donostia zeharkatzen dituen lasterketari buruzko informaziorik osoena eskaintzeko asmoz. Lasterketari buruz jakin beharreko guztia aurkituko duzue gehigarrian, datu interesgarrienak jaso baititugu. Ander Sagarzazu korrikalari donostiarra ere elkarrizketatu dugu. Sailkapen orokorrean 10. postuan geratu zen, lehen gipuzkoarra izan zen. Proba herrikoia izanik, beste hainbat korrikalarirekin ere hitz egin dugu, eta egunotan entrenatzen dabiltzan herritar batzuei egindako elkarrizketak ere irakurtzeko aukera izango duzue.