Udaltzaingoak uko egin zion hustean parte hartzeari.
Eraikina botatzen ari ziren unea. (Argazkia: Lide Ferreira)
Bilduko hainbat ordezkarik bertatik bertara jarraitu zuten
Kortxoenearen hustea, eta momentuan euren
gaitzespena adierazi bazuten ere, gaur agerraldia egin dute gertaeren “larritasuna” salatzeko.
Axier Jakaren esanetan, gaztetxearen
hustuketa “ilegala eta irregularra” izan da: “Eraikinaren jabeak eta eraikuntza enpresak hasieratik erakutsi dute euren asmoa, baina asmo horretan udalak kolaboratu izana oso larria da; udalak bazekien noiz eta nola hustuko zuten gaztetxea”.
Bilduko ordezkarien arabera, hustea ilegala izan da,
ez dagoelako epaile baten agindurik. Ricardo Burutaran zinegotziak azaldu duenez, eraikin bat okupatua dagoenean, epaile baten agindua behar da pertsona horiek bertatik ateratzeko. Gainera, Jakaren esanetan, Kortxoenearen jarduera “aski ezaguna” da: “okupazio iraunkorra eta zilegia izan da beti Kortxoeneako, hau da, jabeak bazuen okupazioaren berri, eta sekula ez du salatu”.
Hortaz gain, Bilduko ordezkarien ustez
modu irregularrean jokatu zuten, eta hori berresteko hainbat adibide eman dituzte. Larriena agian, hustearen modua izan dela adierazi dute. Jakaren arabera, Ertzaintzak ez zuen hustuketan parte hartu, gaztetxe barnealdeko gazteak atera eta ordubetera agertu baitziren. Gazteek salatu zutenez, hortaz arduratu zirenek aurpegia estalita zuten, eta burdinezko barrak erabili zituzten. “Oraindik ez dakigu pertsona horiek zein diren”, salatu du Jakak.
Axier Jaka eta Ricardo Burutaran, Bilduko zinegotziak. (Argazkia: Agurtzane Altuna)
Gainera, Jakaren arabera, gaztetxea hustu eta botatzeko ez zuten legeak agintzen duen 24 orduko eperik errespetatu, eta Indianoene kaleko
bizilagunek ere ez zuten inolako abisurik jaso, autoak aparkalekutik ateratzeko, esaterako.
Eraikina eraisteko unean argiteria piztuta zegoela salatu du Jakak: “korronte elektrikoa zegoela esan nahi du horrek, langileentzako suposatzen duen arriskuarekin”.
Udaltzainek parte hartzeari uko
Bilduren arabera,
Udaltzaingoak ohartarazi zien udal ordezkariei esku-hartzea ez zela legezkoa izango, eta uko egin zioten hustean parte hartzeari: “Gazteek udaltzainei deitu zieten goizean goiz modu bortitzean atera zituztela salatzeko, baina udaltzainik ez zen agertu, Ertzaintzari deitzeko esan zieten gazteei”, esan du Jakak.
Bilduko ordezkarien arabera, hori guztia jakinik ere, bereziki larria da udalaren parte hartzea. Hirigintza zinegotziak, Enrique Ramosek, atzo goizeko 8:00etan sinatu zuela
eraiste baimena salatu du Jakak, baina aurrez bazutela erabakiaren berri.
Gertatutakoa argitu eta udalaren ardura eskatzeko presazko agerraldi bat eskatu du Bilduk. Alkatearen, gaztetxean izandako bi udal teknikarien eta Udaltzaingo-buruen agerraldia eskatu dute, espresuki.
