Carles Castillejo eta Raquel Gomez izan dira Behobia-Donostiako izarrak

Kataluniarra eta espainiarra izan dira azkarrenak 30.000 korrikalari bildu dituen lasterketan.

Estitxu Zabala

2015/11/09

Carles Castillejo, lasterketako irabazlea, helmuga zeharkatzen. (Argazkia: Behobia-Donostia)

Markak hausten jarraitzen du Behobia-Donostia lasterketa ezagunak. Guztira 34.000 lagunek eman zuten izena, baina horietatik 28.262 korrikalari izan ziren azkenean helmuga zeharkatu zutenak, 51. ekitaldian. Beroaren eraginez, denborak beste urte batzuetakoak baino apalagoak izan ziren orokorrean, baina giro ezin hobea izan zen, urtero legez. Carles Castillejo izan zen azkarrena, lasterketa irabaziz, eta emakumezkoetan, berriz, Raquel Gomez espainiarra izan zen lehena: 1:13:39. Castillejok ezin izan zuen ordubete baino gutxiagoan egin ibilbidea, baina denbora oso ona egin zuen: 1:01:12. Behobia-Donostian lehen aldiz hartu zuen parte kataluniarrak, eta erraz nagusitu zen. Jaume Leiva izan zen bigarren sailkatua (1:03:33), eta Jose Carlos Hernandez hirugarrena. Emakumeen podiuma, berriz, Elena Loyok eta Paula Mallobrek osatu zuten.

Sagarzazu eta Egia, lehen donostiarrak

Bidebietako Ander Sagarzazu izan zen euskaldun azkarrena, bederatzigarren postuan sailkatuz. Iaz hamargarren postuan geratu zen Sagarzazu, lehen gipuzkoarra izan zelarik. Emakumeei dagokienean, Nerea Egia izan zen donostiarrik azkarrena; Fortunako igerilaria da eta denbora polita osatu zuen: 1:23:30. Sagarzazuk eta Egiak Hitza Saria jasoko dute aste honetan, lasterketako lehen donostiarrak izateagatik. Behobia-Donostiaren webgunean ikus daiteke sailkapen osoa, patinatzaileena, elbarrituena eta gazteena barne.

Bi hildako

Berriro ere beltzez jantzi da Behobia-Donostia lasterketa. Jose Jabier Sueskun 31 urteko korrikalaria bihotzekoak jota hil zen lasterketan. Duela bi urte, beste korrikalari nafar bat hil zen. Sueskun Berbintzanakoa zen. Helmuga zeharkatu ondoren eman zion bihotzekoak, Segurtasun Sailak jakinarazi duenez. Lagunekin eta sendiarekin joan zen Behobiara lasterketan parte hartzera. Helmugan bertan zegoen kanpainako ospitalean artatu zuten lehenik, baina hango arduradunek ospitalera bidaltzea erabaki zuten. Donostia ospitalean, baina, haren heriotza egiaztatu besterik ezin izan zuten egin. Kirolaria zen, eta gertukoek zaindu egiten zela azpimarratu dute. Sueskunez gain, beste bost korrikalari zainketa intentsiboetako unitatera eraman behar izan zituzten. Behobian, irteeran, ikusle bat hil zen.

Argazki Bilduma

Igandean Behobia-Donostia lasterketan parte hartu zenuen? Proba herrikoirik jendetsuena ikustera joan zinen? Animatu eta bidali irudiak IRUTXULOKO HITZAra, donostia[abildua]hitza.eus helbidera. Selfie-ak, kuadrillako argazkiak, lasterketaren ondorengo bazkarikoak, goizean goiz probara joaten zaretenekoak, animatzaileenak, mozorrotutako korrikalarienak… Zuen irudiak ikusteko gogotsu gaude! Irudi bilduma handi bat osatu nahi dugu gure webgunean. Behobia-Donostia lasterketari buruzko albiste bilduma guztia hemen.

Azken bideoak