Donosti Berri Txirrindulari Eskolak logotipo berria du

Arduradunen arabera, elkartearekin bat egiten du irudiaren urdin argiak.

Estitxu Zabala

2015/11/10

Donsti Berri Txirrindulari Eskolaren logotibo berria.

Donosti Berri Txirrindulari Eskola berrikuntza aroan murgilduta dabil, joan den denboralditik. Hala, zuzendaritza taldea gaztetzearekin batera, pixkanaka hainbat aldaketa egiten ari da kluba. Oraingoan, logotipo berria aurkeztu du sare sozialen bidez, eta horixe izango da elkartearen irudia aurrerantzean. Arduradunen arabera, eskolarekin bat egiten du irudi berriaren urdin argiak, eta eskuzabaltasuna, osasuna, freskotasuna, ulermena eta lasaitasuna islatu nahi ditu.

Unai Intziarte, kolokan

Bestetik, azken berrien arabera, Unai Intziarte Groseko txirrindulariak ez du Murias Team taldean jarraituko hurrengo denboraldian. Lesioak etsai izan ditu gazteak, eta ezin izan du esperotako errendimendua eman. Donosti Berriko txirrindulari ohia da Intziarte, eta azken denboraldia osatu du Muriasen. Zehazki, hamabi txirrindulari izan zituen taldeak joan den denboraldian, eta horietako bederatzik jarraituko dute. Hala ere, oraindik taldea ez dago guztiz itxita, eta baliteke Intziartek bertan jarraitzeko aukeraren bat izatea.