Eusebio: "Nigan jarritako konfiantza eskertzen dizuet denoi, ez dizuet hutsik egingo"

Realeko entrenatzaile berria aurkeztu dute Anoetako prentsa aretoan.

Estitxu Zabala

2015/11/10

Eusebio, prentsaurrekoaren ostean. (Argazkia: Estitxu Zabala)

Realak badu entrenatzaile berria, Eusebio Sacristan. Gaur goizean egin du talde txuri-urdinak Valladolideko entrenatzailearen aurkezpen prentsaurrekoa, eta prentsari euskaraz eskaini dizkio lehen hitzak: “Egun on denori”. Jokin Aperribai presidentea eta Lorenzo Juarros kirol arduraduna izan ditu ondoan Eusebiok aurkezpenean, eta guztiak oso gustura agertu dira hartutako erabakiarekin. “Nigan jarritako konfiantza eskertzen dizuet denoi, ez dizuet hutsik egingo”, adierazi du entrenatzaile berriak. Hain zuzen ere, David Moyesek utzitako hutsunea beteko du Eusebiok, eta urte eta erdirako kontratua sinatu du Realarekin. Ez du lan erraza eskuartean Eusebiok, izan ere, ligako hamaseigarren postuan dago taldea, bederatzi punturekin; gainera, tristura zabaldua dago jokalarien artean. “Pozik nago, eta egunez egun lan egingo dugu gozatu dezaten. Kalitatezko jokalariak ditugu, eta guztiok batera egoera honetatik ateratzea lortuko dugu”, gehitu du entrenatzaileak.

Aperribai, jarrera kritikoarekin

Aperribai oso kritikoa izan da klubaren egoerarekin, eta erantzukizuna guztiena dela esan du, berea barne: “Azken hogei urtean sei aldiz bakarrik lortu du taldeak ligako lehenengo hamar postuetan sailkatzea. Errealitate historiko bat da hori, eta guztien ardura da”. Hala, aurrera begira baikor agertu da presidentea: “Entrenatzaile handi bat ekarri dugu. Bere helburuak lortzen lagunduko diogu, eta berak guri ere bai. Hamar urtez geratzea espero dut, oso seinale ona izango izango litzateke hori”. Moyesen irteerari dagokionean, Aperribaik esan du ordubete igaro zuela berarekin bakarrik hitz egiten, eta elkarrizketa eskuak elkar estutuz bukatu zutela. Horretaz gain, kontratuan zegokiona baino lehenago kanporatua izan den arren, ez duela konpentsazio ekonomikorik jaso esan du presidenteak. Gaur arratsaldean bertan izango du Eusebiok taldearekin lehen harremana; 16:00etan Zubietan bere lehen entrenamendua zuzenduko baitu. Hortik aurrera, Sevillaren aurka izango duten hurrengo partida prestatzeari ekin beharko diote.