Gizon bat atxilotu dute Altzan, bikotekideari eraso egitea egotzita
34 urteko gizon bat atxilotu zuen atzo eguerdian Altzan, bikotekideari eraso egitea egotzita, Ertzaintzak agiri batean zabaldu duenez. Emakumeak Ertzaintzari deitu zion 12:00ak aldera, eztabaida baten erdian senarrak jo eta mehatxu egin ziola ohartarazteko. Patruila bat joan zen, eta ustezko erasoaren biktima aurkitu zuen bertan. Lepoa gorrituta eta besoetan ubeldurak eta atzamarkada gogorrak zituen.
Salatzaileak agenteei esandakoaren arabera, ez zen lehenengo aldia, gizonak aurretik gehiagotan eraso baitio. Horren aurrean, ertzainek atxilotu egin zuten ustezko erasotzailea, genero indarkeriaren delitu bat leporatuta. Ondoren, polizia-etxera eraman zuten, epailearen esku utzi zuten, aurretik egin beharreko izapideak egiteko.
