Filmaketaren bidaia erdia egin du 'Igelak' komediak
Artelekun ari da lanean Patxo Telleriaren taldea, Gorka Otxoa aktore donostiarra barne.
Hirugarren astean murgildu da dagoeneko Igelak filmaren lan taldea. Patxo Telleriaren zuzendaritzapean, Artelekuko eraikina komediarako egokitu, eta istorioko elkarte baten babesleku bilakatu dute. Euskarazko film honen protagonista Gorka Otxoa donostiarra da, eta banku bateko zuzendariaren papera betetzen du. Delitu ekonomikoen ondorioz, etxerik gabeko elkarte batek okupatutako eraikinean sartu, eta bertan topatuko du babesa.
Gaurkoan, komunikabideei ateak zabaldu dizkiete, eta Otxoa Itziar Ituñorekin batera filmatzen ari zen zati bat ikusteko aukera izan dute. Argia, aktoreen lana, kamera, soinua… hamaika elementu kontuan hartzen dutela argi utzi du lan taldeak. Ondoren, aktoreek eta zuzendariak adierazpenak egin dituzte, filmaketa zer moduz doan azaltzeko. Bypass filmeko lan talde gehiena komedia berrian parte hartzen ari direla azaldu du Telleriak, eta oso pozik dagoela lortzen ari direnarekin: “Gai sozial bati buruz hitz egiten du pelikulak, baina nik kutsu komiko bat eman nahi izan diot. Gai hauek gordinak badira ere, errespetuz tratatu, eta komedia bidez kontatu daitezke”. Otxoaren arabera, gidoia irakurri zuenetik oso interesgarria eta erakargarria iruditu zitzaiola esan du: “Nire pertsonaiak gorabehera handiak ditu, eta ibilbidea luzea du: batzuekin modu batean jokatu behar du, beste batzuekin beste batean… Gezurra izango du ardatz”.
Musikak ere zeresan handia duela istorioan azaldu du Telleriak: “Istorioa krisi egoera batean kokatu dugu, eta musikoak besteak bezala kalean daude, esku hutsik eta lanik gabe. Hortaz, bertan agertzen diren musikariek guk aukeratutako kantak abestuko dituzte, eszenan gertatzen dena kontatzeko”. Honela, Ainhoa Arteta, Esne Beltzako Xabi Solano, Gose, Doctor Deseoko Francis, Natxo de Felipe, Oreka TX eta Gatibuk parte hartuko dute. Azken honek Igelak filmaren abesti ofiziala egin du.
Filmaketa abenduaren 18an amaituko dute, eta udarako pelikula prest egongo da.
