Herritar, elkarte, artista zein kolektiboek egindako jarduerek osatuko dute jaialdia berriro ere.
Donostia Kulturako Jon Aizpurua eta Donostia 2016ko Xabi Paia, Olatu Talkaren aurkezpenean. (Argazkia: Estitxu Zabala)
Zabaldu dute epea jada; datorren urteko Olatu Talkarako proposamenak bidal daitezke gaurtik 2016ko urtarrilaren 26ra arte. Zehazki, maiatzaren 20, 21 eta 22an izango da VII. Olatu Talka Jaialdia, eta artista, kolektibo, elkarte eta norbanakoek egindako jarduerek osatuko dute, berriro ere. Proposamenak
www.olatutalka.eu webgunearen bidez aurkez daitezke; “Sormena du oinarri jaialdi honek. Lagun asko gaurko egunaren zain egongo ziren”, aipatu du jaialdiaren aurkezpenean Xabi Paiak, Donostia 2016 Fundazioko Kultur zuzendariak. Hain zuzen ere,
Hiria egin izango da aurtengo jaialdiaren leloa.
Beste behin, Donostia 2016k eta Donostia Kulturak elkarlanean antolatuko dute jaialdia, azken honek 2017tik aurrera jaialdiaren ardura osoa beregain hartu bitartean. “Sei urteren ondoren, hiriko kultur agendan sendotutako jaialdia dugu Olatu Talka. Urtero, 200 bat jardueren programazioaz arduratzen da, eta 2.000 eragile baino gehiagoren parte-hartze aktiboak erakusten du. Hala, iaz, 30.000 herritar baino gehiagok jaialdiaz gozatu zuten”, gehitu du Paiak. Azken batean, Olatu Talka oinarrizko kultur sormenaren erakusleiho eta sustapen plataforma dela diote.
Gainera, Paiaren hitzetan, datorren urtean “parte hartzea” eta “elkarbizitza” denen ahotan egongo dira, eta 2016an Europako Kultur Hiriburu izatera eramango dituen proiektuan murgilduko dira herritarrak. “Hiriko leku ezkutuak topatu nahi ditugu aurten ere, guk proposatutakoak edo herritarrek nahi dituztenak”, azaldu du Jon Aizpuruak, Donostia Kulturako Kultur Ekintzako arduradunak. Iaz, esaterako, Polloe kanposantua eta Iztueta erabili zituzten.
