Beñat Gaztelumendi bigarren sailkatu da Tolosan

Azken finalaurrekoaren faltan, añorgatarrak Illunbeko finala jokatuko luke.

Irutxuloko Hitza

2015/11/30

Unai Agirrek irabazi du Tolosako finalaurreko saioa. (Argazkia: Bertsozale.eus)

Unai Agirrek irabazi du Gipuzkoako Bertsolari Txapelketako azkenaurreko finalaurrekoa Tolosako Usabal kiroldegian. Saioa irabazita, abenduaren 19ko finalerako zuzeneko txartela eskuratu du. Erraz eta bizi aritu da Agirre (517 puntu) ofiziotan zein bakarkakoan. Agirreren atzetik sailkatu dira Beñat Gaztelumendi añorgatarra (501 pt.), Iñaki Apalategi (493 pt.), Oihana Iguaran (482,5 pt.), Nerea Elustondo (476 pt.) eta Beñat Lizaso (458 pt.). Puntuek erakutsi bezala mailak gora egin du bigarren finalaurrekoan. Sei bertsolariek saio bizia osatu dute 1.600 bertsozaleren aurrean. Azken finalaurrekoaren faltan, hauek dira finalerako txartela duten bertsolariak: Alaia Martin (zuzenean), Agirre (zuzenean), Gaztelumendi, Agin Laburu, Apalategi, Iguaran eta Elustondo. Azken finalaurrekoa datorren igandean izango da Eibarren, eta bertan ezagutuko da zein izango den Illunben (abenduaren 19an) kantatuko duen zortzikoa. Eibarko Astelena pilotalekuan Arkaitz Oiartzabal Xamoa, Felix Zubia, Iñaki Gurrutxaga, Jon Maia, Mikel Artola eta Nahikari Gabilondok izango dute finalerako lekua lortzeko aukera. Inaxio Usarralde izango da 17:30ean hasiko den saioko aurkezlea. Lehen finalaurrekoa Zarautzen jokatu zen joan den astean, eta Alaia Martinek eskuratu zuen lehen postua. Eibar eta Illunbeko saioetarako sarrerak salgai daude Bertsosarrerak webgunean.

BERTSOLARIA	PUNTUAZIOA
Unai Agirre Goia	517
Beñat Gaztelumendi Arandia	501
Iñaki Apalategi Astigarraga	493,5
Oihana Iguaran Barandiaran	482
Nerea Elustondo Plazaola	476
Beñat Lizaso Alberdi	458,5

Erlazionatutako edukiaAlaia Martin zuzenean sailkatu da Illunbeko finalerako