Euskal kultura izan dute hizpide San Telmo Museoko Mintzodromoan

Arratsaldeko 17:00etan egingo dute hirugarren saioa.

Agurtzane Altuna

2015/12/03

Mintzodromoa, San Telmo Museoan. (Argazkia: Agurtzane Altuna)

Bagera elkarteak eta Euskara Zerbitzuak antolatzen duten Mintzodromoak agertoki berria izan du aurten, San Telmo Museoko elizan egin baitute. Espazio berria baina dinamika bera errepikatu dute, parte hartzea ikusirik, arrakastatsua baita. Lepo bete dute museoko eliza, 140 pertsona inguruko bi txandatan. Arratsaldean, 17:00etan, egingo dute hirugarren saioa. Ohikoa den moduan, euskaldun zaharrak eta berriak aritu dira solasean, batzuk lotsatiago, beste batzuk lasai, eroso. Aurten euskal kultura izan dute hizpide parte hartzaileek. Batetik, Frankismo garaitik gaur egun arte euskarak izan duen bilakaeraren inguruan eztabaidatu dute: sorkuntza, ikastolen sorrera, Euskaltzaindia… Ondoren, egunotan ahoz aho dabilen Durangoko azoka ere izan dute hizpide. Benetan, euskarazko industria kulturalaren erakusleihoa ote den, edo jai giroak itzal egiten ote dion benetako helburuari. Eta amaitzeko, euskal kulturaren protagonistak erabiltzaileak eta sortzaileak direla abiapuntu hartuta, sortzaileen parekidetasuna jarri dute mahai gainean. Emakumeek gizonek baino kultura gehiago kontsumitzen badute ere, sortzaile, literatura saritu eta bertsolarien artean, esaterako, gizonak baitira nagusi.

Euskaldun zaharrentzako etxeko lanak

Mintzodromoko bigarren saioan, 11:00etakoan, hainbat udal ordezkarik ere parte hartu dute: EAJko Jon Insausti eta Miren Azkarate, eta EH Bilduko Naiara Sampedro eta Amaia Almirall, esaterako. Eneko Goia alkatea ere gerturatu da, eta saioa biribiltzeko hainbat ohar eman ditu. Batetik, euskaldun zaharrei etxeko lanak jarri dizkie. Euskaldun berriek hizkuntza ikasteko egiten duten ahalegina eskertu eta osatzeko erabileran jarri behar dela arreta esan du alkateak; “erabileran baitago gakoa”. Eta bestetik, euskararen normalizazioan urrats garrantzitsuak egin badira ere, “lan handia dagoela egiteko”, esan du, eta “guztien arteko adostasuna” eskatu du. Zentzu horretan, ordezkari politikoek ere badutela ardura onartu du. Mintzodromoan bildu diren parte hartzaile guztiak zoriondu eta euskaraz jarraitzeko animatuz bukatu du alkateak. Hori bai, abenduaren 3az haratago, euskarak 365 egun dituela nabarmendu du.