Ia bi mila euro bildu ditu Donostiako Movember taldeak

Gizonezkoen minbiziaren aurkako ikerkuntzara bideratuko dute.

Nerea Lizarralde

2015/12/03

Azaroa erdialdean egin zuten Bibote Korrika-ko parte hartzaile batzuk. (Argazkia: Movember Donostia)

Azaroaren lehen egunetik lan eta lan aritu dira Donostiako Movember taldeko kideak. Biboteak harro erakutsi dituzte hilabetez, jendearen arreta bereganatu eta minbiziaren kontrako kanpaina zabaltzeko. Azaroa bukatu da, eta hilabetez utzitako biboteak kendu dituzte parte hartzaileek. Donostian 2012an sortu zuten Movember taldea, eta geroztik geroz eta oihartzun handiagoa lortzen ari dira. Azaroaren hasieran festa bat egin zuten Tabakaleran, eta bizarra kendu zuten hainbat lagunek – ikus irudi bilduma-. Mario Maqueda bizargina izan zen bizarrak kentzen, eta bibote dotoreak egiten. Hilabetean zehar hainbat jarduera egin dituzte kanpaina sustatzeko. Running saio bat egin zuten: Bibote korrika.Egun euritsua egin zuen, eta haizeak gogor jo zuen, baina ez ziren kikildu eta kalera atera ziren korrika egitera (ikus argazki bildumako irudiak). Gainera, Onkologikoan Pintxos&Blogs egin zuten. Bertan bildu ziren Ander Urrutikoetxea eta Marta Agirre Izarra doktoreak eta Maider Sierra nutrizionista. Minbiziaz hitz egin zuten, gaixotasunari buruzko informaziorik osoena emateko. Pozik daude Movember taldeko kideak. Aurten inoiz baino diru gehiago biltzea lortu baitute. Ia 2.000 euro, zehazki 1.989 euro. Diru hau guztia, munduko beste Movember taldeek bildutakoarekin batera, minbiziaren ikerkuntzara bideratuko da.