Antiguako jaien aldeko babarrun jana egingo dute hilaren 27an
Dokan egingo dute bazkaria; bingoa, karaokea eta zuzeneko musika egongo da.
Antiguako sansebastianetarako motorrak berotzen hasi dira Antiguan. Jai giroa pizteko gogotsu daude antiguatarrak! Jai batzordeak auzoko jaien aldeko babarrun jana antolatu dute hilaren 27rako. Dokan elkartuko dira denak, elkarrekin bazkaltzeko. Aurretik, ordea, triki bertso-poteoa egingo dute, 12:30ean, Benta Berriko plazatik abiatuta.
Babarrun jana 14:00etan izango da. Bazkarirako txartelak Triku eta Plateron erosteko aukera dago (aurretik, 10 euro). Egunean bertan Dokan jarriko dituzte salgai, 12 eurotan. Babarrun janaz gain, festa giro bikainaz gozatzeko aukera izango da Dokan. Bingoa prestatuko dute, eta auzoko dendek emandako hainbat sari izango dira jokoan. Kontzertu bat ere antolatuko dute. Andoni Ollokiegi ariko da zuzenean Dokan. Eta festan parte hartzen duten guztiek ere agertokira igotzeko eskubidea izateko… karaokea egingo dute. Lotsa alde batera utzi eta abestera animatuko dituzte auzotarrak. “Hori bai, mesedez, inork ez dezala mikrofonoa beretzat hartu. Denok nahi dugu aukera!”, ohartarazi dute.
