Tabakalera berritua ireki dute

Irutxuloko Hitza

2015/12/28

Jendetza bildu du eraikin berrituaren inaugurazioak. (Argazkia: Lide Ferreira)

Irailaren 11n ireki zizkion ateak kulturari Tabakalerak. Inaugurazioan jendez bete zen antzinako tabako fabrika. 2011. urtean hasi ziren eraberritze lanak, eta aurten, lanak bukatuta, kultur proiektuaren espazioak irekitzen hasi dira. Kultur proiektuaz gain, beste zenbait egitasmo pribatu ere hartu ditu Tabakalerak. Oraindik jatetxea, hotela eta kafetegia egiteke daude. Inaugurazioan polemika piztu zen Pottors eta Klito taldeak Kortxoenearen alde egindako aldarrikapena dela eta. Ateak zabaldu aurretik, Pottors ta Klito taldeak kontzertua eman zuen, bildutako jendetzaren eta erakundeetako ordezkarien aurrean —Markel Olano Gipuzkoako ahaldun nagusia eta Eneko Goia Donostiako alkatea, besteak beste—, eta amaitu baino pixka bat lehenago, Autodefentsa feminista kantua ematen ari ziren bitartean, Amaia Gabilondo kantariak, gorputza pintura gorriz tindatuta, “Kultura herriarena. Kortxoenea bizirik” zioen pankarta zabaldu eta erakutsi du, Gros auzoko gaztetxea ixteko asmoa salatuz. Kultura kritikarako, aldarrikapenerako eta polemikarako espazioa dela, eta Pottors ta Klitoren emanaldiaren bidez gaurko jaia “femeninoz eta aldarrikapenez” hasi nahi izan dutela adierazi du gero Ane Rodriguez Tabakalerako Kultura zuzendariak, kontzertuaren ondoren, inaugurazioaren aurkezpena egitean. “Baina hau ez da guk irudikatu nahi genuena”, zehaztu du, eta Tabakalerako arduradunak ez direla kontzertuko une horretan gertatu denaren arduradun egiten. «Guk aukera hau baliatu nahi izan dugu Kortxoenearen alde agertzeko», adierazi du Amaia Gabilondok emanaldiaren ondoren. «Artea denontzako dela ari dira esaten eta gaur haserretu egin zaizkigu egin duguna egin dugulako”.