Hiru erakusketa handi izango dira San Telmo Museoaren 2016ko oinarria

Bisitari gehien uztaila eta abuztua artean espero dituzte, Europako Kultur Hiriburutza dela eta.

Estitxu Zabala

2016/01/08

Susana Soto, San Telmo Museoko zuzendaria; eta Miren Azkarate, udaleko Kultur zinegotzia. (Argazkia: Estitxu Zabala)

San Telmo Museoak 2016rako dituen asmoen berri eman dute Susana Soto museoko zuzendariak eta Miren Azkarate Kultura zinegotziak. 2016a urte indartsutzat jo du Azkaratek, Donostiak Europako Kultur Hiriburutza titulua jaso duela eta: “Aste pare bat barru emango diogu hasiera Kultur Hiriburutzaren izendapenari. Hasieratik argi izan dugu San Telmo Museoa funtsezkoa dela Hiriburutzan, eta erdigunean dagoela”. Hala, 2016rako museoak hiru erakusketa nagusi prestatu dituela zehaztu dute:

‘1996, GAUR KONSTELAZIOAK, 2016’ (urtarrilak 23 – maiatzak 15). Bi testuinguru sozial eta historiko erakutsiko ditu, bi arte konstelazio: Gaur taldearen ingurukoa, eta Kairos garaikidea.
‘BAKE-ITUNAK’ (Ekainak 19 – urria). 2013an abiatutako erakusketa nagusia da, eta San Telmo Museoan eta Koldo Mitxelena Kulturunean ikusgai izango da, beste egoitza batzuez gain. Arteak eta zuzenbideak bakea irudikatzeko erabili dituzten formen analisia egingo du.
‘Modernitate berezia. Abangoardiaren erretratua Donostian 1928-1936’ (azaroa – 2017ko otsaila). Garai nahastu eta aldakor baten kontakizuna egingo du. Artean, arkitekturan, publizitatean eta esparru publikoan izandako kultur adierazpenak barne hartzen dituen narrazioaren bitartez: pintura, collagea, argazki montajeak, eskultura, arkitektura, karikatura, diseinua eta kartela.

Hiruak Eraskusketa Aretoan izango dira, eta arte ederrak izango dituzte gai nagusi gisa. Horiekin batera, laugarren erakusketa bat ere jarriko dute, Patioan: Hondar artean (apirilak 8 – ekainak 19). Federico Guzman Sevillako artistak sortutako jaima jarriko dute, honako gaien inguruko hausnarketa bultzatzeko: kooperazioa, nazioarteko ordena, generoa eta feminismoa, eta giza eskubideak. Museoaren Laborategiari dagokionean, hainbat erakusketa jasoko ditu.

Dagoeneko bertan dago Ikimilikiliklik. J.A. Artzeren unibertsoa, eta otsailaren 14a arte egongo da ikusgai.
Ondoren, San Adrian. Denboraren tunela iritsiko da (otsailaren 23 – apirilak 3). Aranzadi Zientzia Elkarteari esker, Gipuzkoako etapa nagusiak ezagutaraziko ditu, San Adriango tunelean egindako indusketa arkeologikoen bitartez.
Nilo Ibaia. Gizarte egipziarraren barnean (apirila-ekaina). Egiptoren inguruko argazki erreportaje bat jasoko du. Nilo ibaia izango du ardatz, landa eremuetatik hasi eta Cairo hiribururaino.
Euskal kirolak (uztaila-abuztua). Euskal kirolek beste kirol handi batzuen konpetentziari tinko eusten dietela erakutsiko du erakusketa horrek.
Azken urteetan egin duten moduan, zinemaldiarekin lotura izango duen erakusketa labur bat ere jarriko dute irailean. Hala ere, oraindik ezin izan dute horren berri eman, ez baitaukate guztiz lotua.
Gaur El Prado ukitu (urria 2017ko urtarrila). El Prado Museoko hezkuntza alorrak sortutako eta Fernando Perez Suesvunek komisariatutako erakusketa. Museo horretako obra esanguratsu batzuk hiru dimentsiotan bilduko ditu. Bereziki ikusmen murriztua dutenenetzat bideratua egongo da.

Horretaz guztiaz gain, zikloak eta beste hainbat jarduera ere jasoko ditu museoak, ahalik eta eskaintza zabalena eskuragarri izateko helburuarekin. 2015, emankorra Museoak 2015eko aurreikuspenak bete dituela jakinarazi dute, urteko 120.000 bisitariko batezbestekoa mantenduz. Pasolini Roma erakusketa izan da arrakasta gehien izan duen erakusketa. Hain zuzen ere, Pier Paolo Pasolini idazle eta zinemagile italiarraren inguruko erakusketak 16.315 bisitari jaso ditu.