U.K. Bill-en ordez LUMA taldeak joko du Ttan Ttakun irratiaren festan

Nerea Lizarralde

2016/01/14

Luma taldea.

Ttan Ttakun irratiaren festa larunbat honetan ospatuko da Gazteszenan, eta egunotan iragarritako guztiaren ondoren azken orduko aldaketa bat egin dute. Añorgako U.K. Bill taldeak ezingo du festan jo, eta bere ordez Donostiako LUMA bikoteak joko du. Programako gainontzeko ekitaldiak bere horretan mantendu dituzte. Antolatzaileek adierazi dute aurten esfortzu berezia egin dutela, eta kartel txukuna osatu dutela. Egiako aretoan bi gune bereiziko dituzte. Gune handienean kontzertuak egingo dituzte, eta Lagartija Nick, The Limboos, Superdozer eta LUMA taldeak gonbidatu dituzte, besteak beste. Axel Casas eta Imanol Costas ere izango dira areto handian, Discos Bambinos festarekin. Gune txikian DJak eta Performance-ak egingo dituzte: Rude kanka sound, Arakamura, A Toda Madre, Les Marines, Aitona Julian… Gainera zuzeneko irratsaioa bertatik emitituko dute. Sarrerak egunean bertan salduko dituzte, 5 euroren truke. 23:00ean hasiko da festa, eta 06:00ak arte luzatuko da.