Osasuna, hezkuntza eta festaren izenean

Aritz Sorzabal

2016/01/19

Sarituak, dominarekin. (Argazkia: Aritz Sorzabal)

Hiritar Merezimenduaren Dominak banatu dituzte arratsaldean, San Sebastian eguna hasteko atarian. Osasuna, hezkuntza eta festarako grina egon dira ordezkatuak garaikurretan; Katxalin, Juan Ojanguren medikua, Chernobil elkartea, Nazaret zentroa eta Itzurun konpartsaren eskutik. Bularreko eta ginekologiako minbiziak eragindako emakumeen elkartea da Katxalin, eta Txaro Beobidek zintzilikatu du domina haren izenean: “Bultzada bat da gure lana ezagutzera emateko”, esan du, eta elkartea emakumeentzat “euskarri garrantzitsu bat” dela nabarmendu du. Parte Zaharreko osasun etxeko medikua izan da Juan Ojanguren, eta erretiroa hartu berri du. Herritarren aldetik hitz onak besterik ez ditu jaso bere ibilbidean zehar. “Jendeak oparitutakoa nik eskainitakoa baino hegiago da”, adierazi du. Nazaret zentroko zuzendari Maria Jose Rabellak jaso du domina ondoren, eta irakasle batek bertso bat bota du. “Domina hau, zaindu ez ezik, garatzen ere saiatuko gara”, esan du Rabellak. Bertsolariaren hitzak bere egin ditu Nazaretek: “Pausoz pauso, lortu nahi dugu berdintasun osoa”. Chernobil elkarteak ere garaikurra jaso du, bertako presidente Marian Izagirreren eskutik. Boluntarioei eskaini die saria, eta Chernobileko istripuaren 30. urtemuga dela ekarri du gogora. Elkarteak, bere aldetik, 20 urte bete ditu aurten. Bukatzeko, Itzurun konpartsako erraldoi eta buruhandiek girotu dute ekitaldia. Udaletxeko udalbatzarren aretoan sartu dira, dantzari. Konpartsako kide Mikel Argomanizek hartu du hitza, eta Aste Nagusia urteko data esanguratsuena dela eurentzat berretsi du.