Bukatu da San Sebastian eguna

Irutxuloko Hitza

2016/01/21

Gauerdian hasi da festa Donostian, San Sebastian eguneko banderaren igoerarekin, eta 24 orduren ondoren, donostiarrek agur esan diote. 16.000 pertsona atera dira kalez kale danborra jotzen, eta 135 konpainiak festa girotu dute banderaren igoeratik jaitsierara. Konstituzio plazako ekitaldi nagusia, bandera jaitsierak, keinu egin dio Europako Kultur Hiriburutzari. Bandera igoeran bezala, Europako ereserkia jo dute, eta berriz ere hainbat herritarrek txistu egin dute. Europako bandera argiztatu bat ere erakutsi dute oholtza gainean, magia truku baten ondoren. Easo abesbatza eta Union Artesana danborrada izan dira oholtza gaineko protagonistak. 140 ahotsek San Sebastian martxa, Antzinako martxa eta Europako ereserkia kantatu dituzte, besteak beste. Aurreko ekitaldietan bezala, Union Artesanak gonbidatu bereziak ekarri ditu oholtza gainera. Aizpea Goenaga Etxepare Institutuko zuzendaria -urketari nagusi gisa-, Juanjo Ocon orkestra zuzendaria, Marta Cardenas margolaria, Edu Muruamendiaraz eta Jon Maya dantzariak, Mitxel Ezquiaga kazetaria eta Hansel Cereza Kultur Hiriburutzaren inaugurazio ekitaldiaren diseinatzailea. 00:45ak aldera bukatu da festa, musika amaitu eta oholtza hustu denean. Banderaren jaitsieran giro ederra izan da, eta eguraldia lagun izan du gainera. San Sebastian egun osoan ez du euri tantarik bota, eta lasai asko desfilatu dira konpainia guztiak.

Azken bideoak