Arte ederrak oinarri
San Telmo Museoak hiru erakusketa handi aurreikusi ditu 2016rako. Horietatik lehena zabalik dago jadanik, Europako Kultur Hiriburutzarekin elkarlanean: ‘1966/ Gaur Konstelazioak/ 2016’.
‘ Gaur Konstelazioak’ erakusketa maiatzaren 15a arte dago ikusgai. Irudian, Fernando Golvano komisarioa, azalpenak ematen. (Argazkia: Lide Ferreira)
Berritzaileak
Gaur Konstelazioak erakusketak bi testuinguru sozial eta historiko erakutsiko ditu, bi arte konstelazio: Gaur taldearen ingurukoa eta Kairos garaikidea. 1966an, Gaur Taldea osatu zuten zortzi artista euskaldunek: Amable Arias, Rafael Ruiz Balerdi, Nestor Basterretxea, Eduardo Chillida, Remigio Mendiburu, Jorge Oteiza, Jose Antonio Sistiaga eta Jose Luis Zumeta. Hauek izan ziren «euskal artearen konstelazio garrantzitsu eta berritzaileena» sortu zutenak. Hirurogeiko hamarkadaren erdialdean, diktadura frankista zela eta, ez zen erraza kultura sorkuntzari bide ematea. Horregatik, artista horiek guztiak elkartu egin ziren, Gaur Taldea sortzeko, eta, 1966an, beren burua jendaurrean aurkeztu zuten, erakusketa eta manifestu baten bidez, Donostiako Barandiaran galerian. Ordutik, berrogeita hamar urte igaro dira, eta Kairosen Gaur Taldean parte hartu zuten artisten ondorengo belaunaldietako eta errealitate nazional desberdinetako zortzi artistak hartzen dute parte: Txomin Badiola, Bojan Fajfric, Goldschmied & Chiari, Iratxe Jaio + Klaas van Gorkum, Eugenio Ortiz, PSJM, Avelino Sala eta Azucena Vieites. Horien obrek elkarrizketak ezartzen dituzte elkarren artean eta, aldi berean, Gaur Taldeko artistek hirurogeiko hamarkadako testuinguruan eginiko obrekin. Erakusketaren harira, omenaldi bat egin nahi diote Dionisio Barandiarani (Ataun, 1927–Donostia, 1979), bera izan baitzen, hain justu, arte konposatuko hainbat erakusketa barne hartu zituen Barandiaran galeriaren mezenasa (1965-1967). Galeria honek gutxi iraun bazuen ere, protagonismo handia izan zuen Euskal Herriko artearen eta kulturaren berrikuntzan: Gaur Taldearen egoitza izan zen, baita horrekin lotutako beste zenbait talderena ere; esaterako, Ez Dok Amairu (musika herrikoia), Argia (dantza) eta Jarrai (antzerkia).Artea eta zuzenbidea
Bake-itunak 2013an abiatutako erakusketa nagusia da, eta San Telmo Museoan eta Koldo Mitxelena Kulturunean ikusgai izango da, beste egoitza batzuez gain. Arteak eta zuzenbideak bakea irudikatzeko erabili dituzten formen analisia egingo du. Modernitate berezia erakusketak, berriz, garai nahastu eta aldakor baten kontakizuna egingo du. Artean, arkitekturan, publizitatean eta esparru publikoan izandako kultur adierazpenak barne hartzen dituen narrazioaren bitartez: pintura, collagea, argazki montajeak, eskultura, arkitektura, karikatura, diseinua eta kartela. Museoaren Laborategiari dagokionez, hainbat erakusketa jasoko ditu. Dagoeneko bertan dago Ikimilikiliklik. J.A. Artzeren unibertsoa, eta otsailaren 14a arte egongo da ikusgai. Ondoren, San Adrian. Denboraren tunela iritsiko da, otsailaren 23 eta apirilak 3 bitartean. Aranzadi elkarteari esker, Gipuzkoako etapa nagusiak ezagutaraziko ditu, San Adriango tuneleko indusketen bitartez. Nilo Ibaia. Gizarte egipziarraren barnean apirila eta ekaina bitartean egongo da aukeran. Egiptoren inguruko argazki erreportaje bat jasoko du, Nilo ibaia ardatz. Euskal kirolak uztaila eta abuztuan egokituko dute, euskal kirolek beste kirol handi batzuen lehiari tinko eusten dietela erakusteko. Azken urteetan egin duten moduan, zinemaldiarekin lotura izango duen erakusketa labur bat ere jarriko dute irailean, eta, urritik 2017 urtarrila bitartean, Gaur El Prado ukitu etorriko da. El Prado Museoko hezkuntza alorrak sortutako erakusketa da. Museo horretako obra esanguratsu batzuk hiru dimentsiotan bilduko ditu.
