Tabakalerako laborategi programa berria abian da

Jardun zinematografiko eta ikus-entzunezkoen inguruko laborategi egitarauaren lehen saioa egin dute asteburuan.

Lide Ferreira

2016/02/01

Laborategi programen aurkezpena egin zuten aurreko astean. (Argazkia: Tabakalera)

Kultura Garaikidearen Nazioarteko Zentroak praktika zinematografikoa eta ikus-entzunezkoen inguruko laborategi programa berri bat jarri du abian. Honek sorkuntza garaikideko ikus-entzunezkoen narratiba berriei buruzko hausnarketa bultzatzea du helburu, baita ezagutza praktika eta teorikoa helaraztea ere. Urtean zehar garatuko diren laborategi ezberdinak eskaintzeko, nazioarteko nahiz bertako profesionalak gonbidatuko ditu Tabakalerak, euren sormen prozesu eta esperientziak partekatu ditzaten tailerreko partaideekin. Honela, ikus-entzunezkoa ikusi, pentsatu eta sortzeko espazio berria ekarriko dute tailer hauek; finean, irudi mugikorraren alorrean sormenerako testuinguru berria eskaini nahi du proiektuak, Tabakalerak kontuan hartzen duen praktika garaikidea delako ikus-entzunezkoarena.

15.20 lagunen taldeak laborategi bakoitzeko

Profesionalei edota ikus-entzunezkoetan interesa dutenei zuzendutako laborategi hauek goizez zein arratsaldez izango dira. Bi egunetik astebete bitarteko iraupena izan dezakete, proposamen bakoitzaren ezaugarrien arabera, eta 15-20 lagunen taldeak sortuko dira laborategi bakoitzeko. Izena aldez aurretik ematea beharrezkoa da. Asteburuan egin duten lehenengoa Zinemagilearen burua izan da. Sergio Oksman (Brasil) zinema dokumental garaikidearen erretratugile aipagarrienetakoa da. Bera izan da, bere lankide Carlos Muguiro gidoigile nafarrarekin batera, 2016rako programatu den aurreneko laborategia gidatu duena. Hiru hilabete hauetan egingo dituzten hurrengoa otsailaren 22tik 27ra eskainiko dute, 16mm-tan errebelatzeari buruzko tailer baten bidez.