Hirikilabsen egin dituzten proiektuak ezagutu nahi dituzu?
3D inpresora bat, makineria digitalarekin egindako bizikleta bat edo bide jokoak sortzeko plataforma bat; horiexek dira Tabakalerako laborategian eratu dituzten hiru adibide.
Tabakalerak eta Donostia 2016k Hirikilabsek aurten egingo dituen lanen berri eman dute, laborategian bertan egindako prentsaurrekoan. Herritarren ahalduntzea bultzatzeko kultura digitalari eta teknologiari eskainitako laborategia da Hirikilabs. Hala, orain arte garatu dituzten hainbat proiektu aurkeztu dituzte gaur –Openbike, 3D inpresora eta DonostiTron proiektua–, eta ostegunean, otsailak 18, Plaza programaren bosgarren deialdiaren aurkezpen publikoa egingo dutela adierazi dute, 19:00etan, Tabakaleran. Bertaratzen diren herritarrek, proiektu irekietan parte hartzeko aukera izango dute. Lan taldeak osatuta, sei hilabetetan ostegunero elkartuko dira parte-harztaleak, euren proiektuak aurrera eramateko.
Plaza Hirikilabsek garatzen dituen bost lan ildoetako bat da. Kultura digitala eta teknologiaren inguruko proiektu bat gauzatu nahi duen edonork elkarlan berriak bila ditzake bertan, bere ideiaren aurkezpen publiko baten bidez. Gaurkoan Plazako deialdi ezberdinetan egon diren hiru proiektu ekarri dituzte prentsaurrekora, eta arduradunek bakoitzaren inguruan xehetasunak eman dituzte:
- 3D inpresora – Koldo Artola eta Iñaki Leizaola (Eraikizpi & Domotek). Leizaolak jakin-nahi bat zuen: metalezko formak inprimatuko zituen inpresora bat egin nahi zuen. Hirikilabsek antolatutako tailerretan ezagutu zuen Artola eta elkarrekin proiektua aurrera ateratzea erabaki zuten: “Laborategian proiektua garatzeko espazioa eta tresnak eduki genituen. Egurra, adibidez, hemen dauden makinekin moztu genuen. Eta zenbait gauza tekniko konpontzen lagundu ziguten Hirikilabseko langileek. Horrela lortu genuen inpresora garatzea”.
- Openbike – Raquel Ares eta Iñaki Albistur (Arquimaña). Bizikleta bat da sortu dute, eta ia elementu guztiak ekoizpen eta makineria digitalarekin egin dituzte. “Gure arkitektura estudioan egiteko aukera genuen, baina interesatzen zitzaigun komunitate bat sortzea bizikletaren eta diseinuaren inguruan”, azaldu du Aresek. Hala, bildu zuten jendeak asko lagundu zietela esan dute, eta hainbat prototipo sortu ostean, bizikleta eredu bat egin zuten. Orain, lanean dihardute, proiektua hobetzeko asmoz.
- DonostiTron – Alex Martin eta Daniel Artamendi. Herritarrei zuzendutako plataforma ireki bat da, bideo jokoak sortzeko helburuarekin. Bideo joko horien eraketa eta aurkezpena arcade makina baten bidez egin ditu. “Altzari zahar batetik abiatu ginen, eta makinaz gain, harwarea, motorrak eta abar berritu genituen”. Orotara, zazpi lagun ibili dira proiektuan.
