Irekiera dela eta, egitarau berezia antolatu dute martxoaren 18tik 20ra bitarte.
(Argazkia: Tabakalera)
Ubik, arte garaikidean espazializatua eta hiritar guztiei irekia dagoen
Tabakalerako sorkuntza liburutegia da, eta hiru ardatzen inguruan garatzen da: ikasi, egin eta gozatu. Ezinbesteko eta oinarrizkoak diren edozein liburutegiko zerbitzuez gain, ikaskuntza eta sorkuntza gaitasunak lantzen ditu. Gaian espezializatutako publikoari; pentsamendu garaikidean, arteetan, teknologian, ikusentzunezko eta soinuan, eta bideojokoetan interesa duen pertsona orori zuzenduta dago.
Bada, martxoaren 18an irekiko ditu ateak, eta asteburu horretan programazio berezia eskainiko du:
- Martxoaren 18tik 20ra. Esku hartzea: TINTA EROALEAREKIN EGINDAKO GRAFFITIA. Ubik, teknologiaren txokoan, egun osoan zehar.
400 Muralismo-ko kideek tinta eroalearen graffitia egingo dute. Tinta eroaleak, gainontzeko tintek bezala funtzionatzen du, baina hau elektrizitatearen gidari ere bada. Horrela, muralarekin eta espazio digitalean dauden beste elementuekin elkarri eragin ahal izango diogu eta Graffitiaren sortze-prozesua bizitu. Helburua, elementu plastiko eta teknologikoak erabiliz, teknologiarekin harremana duen mural bat sortzea izango da.
- Martxoaren 18tik 20ra. Grabaketa: UTZI ZURE MEZUA. Ubik platoan, egun osoan zehar eta edonori zuzenduta.
Ubik guztientzat sortu den liburutegia da, eta, horregatik, herritarren iritzia jakin nahi dute lehenengo egunetik. Platora joateko gonbite bat da, bertan herritarrek euren mezua klip motz batean utzi dezaten. Eurek erabaki beharko dute zein eginkizun burutu nahi duten: esatari, kamerari, teknikari…
- Martxoaren 18tik 20ra. Lantegia: ZEIN DA UBIKEN ZAPOREA? Ubik-eko Mendebaldeko galerian, egun osoan zehar eta edonori zuzenduta.
Ubik-ek proposatutako iradokizun edo estimulu batetik abiatuta, bisitarien gogoetak jaso nahi dituzte. Proposamenak era ezberdinetan egin ahal izateko, hainbat material ipiniko dituzte bertaratzen direnen eskura. Guztien ekarpenekin egindako lanaren emaitza ikusteko erronka izango da.
- Martxoaren 18tik 19ra. Esku hartzea: PAPER PIXELAK. POST-ITEKIN MARRAZTEN. 11:30etik 13:30era, Ubik-eko kafean, edonorentzako.
Ubiken irekiera ospatzeko, adin guztietako publikoa elkartu nahi dute, eta koloretako
post-it-ak erabiliz, pixelatutako irudi bat osatu, puzzle baten antzera.
- Martxoaren 18tik 19ra. Lantegia: BERRERAIKITZEN. ESPAZIOAREKIN JOLASEAN. 17:00etatik-19:00etara, Ubik-eko lantegian, edonorentzako.
Ezagun zaien paisaia bat bakoitzaren behar, nahi eta interesen arabera berreraikiko dute. Espazio eta arkitektura lantzen dituzten edukietatik harago, jostailu eta eskulanen bidez imajinatzen duten hori irudikatu ahal izango dute.
- Martxoaren 18an. Hileroko topaketa: VIDEO KILLED THE RADIO STAR. 17:00etatik 19:00etara, Ubik-eko pantaila esperimentalean, 16 urtetik gorakoentzako. Gonbidatua: Itziar Orbegozo. Izena emateko Tabakalerako webgunera jo behar da edo eraikineko informazio puntura.
MTV-k 1981 urtean lehenengo bideoklipa programatu zuenetik, abesti, sortzaile, zuzendari, teknika eta formatu ugari ikusteko aukera egon da. Bizitzaren momentu desberdinak berbizitu daitezke abestien inguruan egiten diren film labur horien bidez: klasikoak, garaikideak, txuri-beltzekoak, aitzindariak, analogikoak, digitalak, esperimentalak, xumeak… Estilo guztiak barne har ditzakete ikus-entzunezko lan labur horiek. Bideoklipak gustukoak izan eta ikusi, gozatu, aztertu eta esperimentatu nahi izanez gero, hemen izango dute topalekua.
- Martxoaren 18an eta 19an. Lantegiak: DIY ‘ARCHIVA’. Gelen Jeletonen “Archiva” proiektuaren inguruko ikerketa bultzatzeko, fanzine, diska, pegatina eta abarren erakusketa. Gainera, fanzine feministen inguruko bi lantegi proposatzen dituzte:
– Martxoaren 18an. Lantegia: LA COMIQUERA. Ubik-eko autoedizio txokoan, 18:00etatik 20:00etara, gazteleraz eta 16 urtetik gorakoentzako. Izena emateko Tabakalerako webgunera jo behar da edo eraikineko informazio puntura. Lantegi honek kontatzeko modu berriak aurkitu nahi ditu; komikiak berrikusi eta berreraiki argitalpen ez-arautuak nabarmenduz. Gizarteaz hitz egiten duten komiki bihurri eta cuir-ak egin nahi dituzte, kalko, collage, detournement, testu ezabaketa eta beste teknikak erabiliz. Binetetaz zerbait jakin nahi duenari zuzenduta dago, marrazten jakin edo ez jakin.
– Martxoaren 19an. Lantegia: FEMZINE ETA PERZINEAK. DIY ETA DIWO. Ubik-eko autoedizio txokoan, 18:00etatik 20:00etara, gazteleraz eta 16 urtetik gorakoentzako. Izena emateko Tabakalerako webgunera jo behar da edo eraikineko informazio puntura. Partekatutako istorio pertsonaletatik abiatuta, bakarkako fanzineak egingo dituzte; fanzinea istorioak kontatzeko ardatz gisa. Fanzine mundura sarrera txiki bat egingo dute, herstory eta grrrl zinematik hasita, eta fanzineen sorkuntzan baliatzen dituzten teknikak erabiliko dituzte euren fanzinea sortu ahal izateko: collagea, zigiluak, marrazkiak, orri bakarreko koadernaketak…
- Martxoaren 18an eta 19an. Rally: UBIKAMERA: 8 ORDUZ ZINEMAGILE. Ubik-eko platoan, 10:00etatik 20:00etara, 12 urtetik gorakoentzako. Izena emateko Tabakalerako webgunera jo behar da edo eraikineko informazio puntura.
Ordu gutxi batzuetan bideo bat egin beharko dute, ezusteko gai baten inguruan. Taldea osatu eta izena eman behar da.
- Martxoaren 19an. Lantegia: TOLESTU. ORRI BAKARREKO LIBURUXKAK SORTZEN. Ubik-eko autoedizio txokoan, 11:00etatik 13:00etara, edonorentzako.
Orri bakarra hartu eta tolestuz, liburuxka txikiak sortu ahal izango dituzte, forma eta orrialde kopuru desberdinak lortuz. Hala, marrazki, irudi edo hitzekin betez, sortzaile bilakatuko dira bertaratzen direnak.
