Bilera bat egingo dute Txomin Eneako lanen xehetasunak emateko auzotarrei

Agurtzane Altuna

2016/03/01

Txomin Eneako lanak. (Argazkia: Estitxu Zabala)

Txomin Eneako hirigintza proiektuarekin hasiko dira datozen egunetan. Hasiera ofiziala bihar egingo dute, ordea. Eneko Goia alkatearen esanetan, lanen berri emateko bilera ireki bat egingo dute auzotarrekin: “Ez gara lehen harria jartzera joango, baina bizilagunekin egingo dugun bileraren bidez hasiko dira ofizialki Txomin Eneako lanak”. 19:30etan egingo dute informazio saioa, udaletxeko udalbatza aretoan. Etxebizitza publikoei dagokienez, “udalaren hirigintza proiekturik garrantzitsuena” dela Txomin Eneakoa esan du alkateak. Eta bide batez, ur goraldien kalteak saihesteko irtenbide bat emango zaio auzoari.

Urumeako lanen bigarren fasea

Txomin Eneaz gain, Urumea ibaiaren ibar osoan ari da lanean Donostiako Udala uholdeak saihesteko. Martuteneko lanak aurrera doaz, eta udala hasi da dagoeneko bigarren fasea prestatzen. Martuteneko zubitik kartzela ingururainoko lanak egin nahi dituzte bigarren fasean. Alkateak jakinarazi duenez, dagoeneko aztertu dute zein lur beharko dituzten lanak egin ahal izateko, eta desjabetze proiektua jendaurrean jartzea onartu du gaur Tokiko Gobernu Batzordeak. Donostiako udalari dagokio lurren jabetza eskuratzea, gero URA agentziak Urumea ingurua egokitzeko lanak egin ahal izateko.