Garagardo egarriz daude Amaran
II. Irlandar Astea hasiko da gaur Easo plazan.
Badator II. Irlandar Astea, eta harekin batera, garagardo azoka. Amarako Easo plazan garagardo goxoekin bustiko dituzte eztarriak. Gaur irekiko dute plazan jarri duten karpa, 18:00etan.Garagardoaz gain, jatekoa ere izango da, eta hori guztia kultur ekitaldi desberdinekin nahastuta. Gaur gauean bertso musikatuez gozatzeko aukera izango dute, 21:00etan. Oihana Iguaran, Amaia Agirre, Xamoa eta Beñat Gaztelumendi bertsolariak izango dira kantuan, Iker Iriartek jarritako gaiak lantzen. Eneko Sierrak eta Ixak Arrutik jarriko dute musika.
Igandea arte izango da zabalik karpa. Ostiralean ere 18:00etatik aurrera izango da zabalik; larunbat eta igandean, berriz, eguerdian irekiko dute. Egunero musika irlandarrarekin girotuko dute karpa, eta jatekoa prestatuko dute egunero: ukondoa, saltxitxak, rabak, olibak eta postreak. Sei garagardo mota dastatzeko aukera izango da, hiru berezi eta hiru arrunta.
