Bretxako egoeraz galdetzeko interpelazio bat aurkeztuko du EH Bilduk.
Bretxako Arrandegi eraikina. (Argazkia: Lide Ferreira)
Jakina da Bretxako Arrandegia eraikina egokitu eta erabilera publiko bat emateko asmoa duela
Donostiako Udalak. Erdialdeko eta Parte Zaharreko bizilagunei zerbitzua emateko
osasun etxe berri bat eta
kiroldegi bat egitea da asmoa.
Aurreko legealdian jarri zen abian prozesua, baina EH Bilduko Josu Ruiz zinegotziak adierazi duenez, udal gobernuak ez du aurrerapenik egin: “urtebete igaro da azken izapideak eta zirriborroak egin genituenetik, eta oraindik ez dute proiektu zehatzik aurkeztu”.
EAJ eta PSE-EEren “kudeaketa falta” salatu du Ruizek, eta sinesgaitza iruditzen zaio euren jarrera: “Aurreko legealdian hainbatetan eztabaidatu genuen gaia udalbatzarrean, eta orduan premiazkoa zenak, orain ez du jarraipenik”, adierazi du.
Osasun etxea eta kiroldegia dira EH Bilduk defendatzen dituen proiektuak, eta bide hori jorratzeko “aurrerapausoak emateko” eskatu dio udal gobernuari. Interpelazio bat aurkeztu dute, eta martxoaren 22ko udalbatzarrera eramango dute gaia, bertan eztabaidatzeko.
Altzako kiroldegia
Abian ziren proiektuei jarraipena emateko ezintasuna eta kudeaketa txarra salatu ditu EH Bilduk Altzako kiroldegiaren kasuan ere. 2015eko maiatzan enpresa irabazleak bere proiektua aurkeztu zuela azaldu du Josu Ruizek; Irailaren 9an oniritzia eman zion udalak, eta azaroaren 3an egin zuten esleipena.
“Gobernu batzordeak oraindik ez du exekuzio proiektua onartu; ez dugu atzerapena ulertzen”, esan du Ruizek. Gai hau ere hurrengo udalbatzarrera eramango dute, mozio baten bidez.
EH Bilduren ustez “atzerapen justifika ezinak” dira, eta bildur dira ez ote diren garaiz ibiliko, aurreikusitako moduan, uda baino lehen kirodegiaren eraikuntza lanekin hasteko.
