Gidaririk gabeko ibilgailuak abian dira Miramongo Teknologia Parkean

Hiru hilabetez ibiliko dira froga gisa, 7:30etik 19:30era.

Agurtzane Altuna

2016/04/06

Gidaririk gabeko autobus automatizatua, Miramongo Parke Teknologikoan. (Argazkia: Agurtzane Altuna)

Mugikortasun iraunkorra da Donostiako Udalak mahai gainean duen erronka nagusia. Ibilgailu elektrikoak txertatzen ari dira udal autobus eta autoen sarean, esaterako. Gaur beste pauso bat eman dute: CityMobil2, gidaririk gabeko lehen autobus automatizatua aurkeztu dute Miramongo parke teknologikoan. Tecnalia ikerketa-zentroak eta Navadays aholkularitza enpresak bideratu dute proiektua, Gipuzkoako Parke Zientifiko eta Teknologikoaren eta Donostiako Udalaren laguntzarekin. Europa mailan garatu den proiektu bat da, eta Europako beste sei hiritan frogatu ostean etorri dira ibilgailuak Euskal Herrira. Oristano (Italia), Lausanne (Suitza), La Rochelle eta Sophia Antipolis (Frantzia), Trikala (Grezia) eta Vantaa (Finlandia) hirietan frogatu dituzte hain zuzen ere. Hiru autobus automatizatu sortu dituzte, eta gaurtik aurrera erabilgarri egongo dira Miramongo teknologia parkeko joan-etorrietarako. Gidaririk gabeko autobusek bi kilometroko ibilbidea egingo dute, 7:30etik 19:30era etenik gabe, astelehenetik ostiralera. Bakoitzak hamar lagunentzako lekua du, eta sei geldialdi egingo ditu. Zerbitzua doan da. Proiektu honen helburua ibilgailu automatizatuak hiriguneetan eta garraio publikoan nola txertatuko liratekeen aztertzea da, eta bide horretan sakontzea. Iñaki San Sebastian Tecnaliako zuzendari nagusiak azaldu duenez, “mundua aldatu zen, garraiobideak aldatu zirelako, eta orain, beste aldaketa baten atarian gaude”. Mugikortasun iraunkorra helburu izanik, proiektu pilotu honen bidez “hiria laborategi” bihurtu dutela adierazi du San Sebastianek, mugikortasun ereduarekin batera, hiri eredua ere aldatuko dela sinetsita baitago.

Hiru hilabetez horrelako hiru ibilgailu ibiliko dira parkean. (Argazkia: Agurtzane Altuna)

Gidaririk gabe, baina kontrolpean

Hiru autobus automatizatuak kontrol-zentro batera konektatuta daude, eta bertatik kontrolatzen dituzte, WiFi bidez. Horrela, denbora errealean egin dezakete ibilbidearen jarraipena, eta argibide zehatzak eman ibilgailu bakoitzari. Ibilgailuak elektrikoak dira, eta momentuz 12 kilometro orduko abiadura hartzen dute soilik. Doitasun handiko sistema baten bidez ibilgailuek badakite non dauden, eta zehatz-mehatz ezagutzen dituzte parkeko xehetasun guztiak. Radar moduko batzuen bidez, berriz, bideko oztopoak edo ezustekoak sumatzen dituzte eta inguruan gertatzen den guztia kontrolatu. Dena dela, langile bat joango da uneoro ibilgailu barnean, erabiltzaileei informazioa emateko eta, behar izanez gero, ibilgailuaren kontrola bereganatzeko. Izan ere, sarritan robot moduko ibilgailuek ezin diete aurre egin gizakiak egiten dituen arau-hausteei. Donostiako Udalak moldaketa batzuk egin ditu Miramongo parkean autobus automatizatuentzako ibilbidea egokitzeko. Dbus-en 28 linean aldaketak egin dituzte, eta autoentzako 260 leku kendu dituzte, esaterako. Aldaketa hauek bere onera etorriko dira hiru hilabeteko froga pilotoa amaitzen denean. Zentzu horretan, Eneko Goia alkateak adierazi du, desiragarria litzatekeela aldaketak bere onera ekarri beharrik ez izatea, “sistema barneratu eta mugikortasun eredu berria txertatu izanaren seinale” litzatekeelako. Hortaz, eredua sortua dago jada, denborak esango du Donostiako kaleetan txertatzeko modukoak den ala ez.