Datorren igandean, apirilak 10, egingo dute lehen saioa, 10:30etik aurrera.
Haur bat hondarretan. (Argazkia: Uliako Lore Baratzak)
Udaberriak lore eta landareen edertasuna piztu ohi du, eta kolorez jantzi natur guneak. Hala gertatuko da Uliako parkean ere. Udaberriko landaketak egiteko lehen prestaketak egin dituzte, landa eremua garbitu dute auzolanean, eta ur-biltegiak ezagutarazteko bisita gidatuek ere harrera ona izan dute.
Uliako Lore Baratzak proiektuko kideek lanean dihardute,
Donostiako Udalaren hirigintza asmoei muzin eginez. Asteburu honetarako ere prestatu dute egitaraua.
Batetik,
bioeraikuntza ikastaro bat eskainiko dute. Bi saio egingo dituzte, eta larunbatean izango da lehena. Hurrengoa, berriz, apirilaren 16an izango da. Saio teoriko-praktikoak izango dira. Bioeraikuntzaren oinarriak ikasiko dituzte, akaberak nola egin eta baita egiturak eta hormak nola egin ere.
Teorian ikasitako hori praktikan jarriko dute, eta mintegietako
informazio edo harrera bulegoa izango den txokoa eraikiko dute. Hondatuta dauden baratze taulak ere konponduko dituzte, teknika iraunkorren bidez.
Ikastaroak doan izango dira, baina parte hartu nahi dutenek
aurrez izena eman behar dute:
tailerrak.uliakolorebaratzak@gmail.com edo 635723078. Larunbateko ordutegia 9:00etatik 14:00etara izango da.
Txikiak, sortzaile handiak
Bestalde, parkeko natur baliabideak haurren eskura jartzeko beste jarduera bat antolatu dute:
Lorategi ezkutua. Astearteetan egiten duten Txiki Pups eta ostegunetako Txiki Foxes jarduerek duten arrakastari tiraka asmatu duten jarduera da.
Hilean behin egingo du Lorategi ezkutua, eta datorren igandean,
apirilak 10 izango da lehen saioa. Oraingoan harea izango da protagonista. Erraz moldatu eta txikienen gozagarri izan ohi den materiala da hondarra: formak eta eraikuntza egin daitezke, zuloak, gordelekuak, marrazkiak…
Etxeko txikienek
hondarrarekin jolastu eta euren irudimena garatzeko gune bat prestatuko dute igandean. Goiz osoko jarduera irekia izango da, 10:30ean hasita.
