Jaiak iragarriko dituzte larunbatean

Txanpontxo Eguna ospatuko dute Bidebietan; egun osoko egitarauan festa giroa izango da nagusi.

Lide Ferreira

2016/04/07

Bidebietako Jai Batzordeko hainbat kide, auzotarrekin batera. (Argazkia: Lide Ferreira)

Oraindik hilabete inguru falta den arren, Bidebietako jaiak hurbil daudela iragartzeko Txanpontxo Eguna egingo dute larunbatean (apirilak 9). IRUTXULOKO HITZA auzoko jai batzordearekin izan da, festaren xehetasun guztiak ezagutzeko. Jaietako diru laguntzen deialdia hilabete batzuk lehenago egin dute aurten. Aldaketak Donostiako hainbat auzoei eragin die, tartean, Bidebietari. Hala, ezin izan du eskaera garaiz aurkeztu. “Abisua ez genuen behar bezala jaso, eta horren aurrean ez genuen geldi geratzeko asmorik. eta hasieran dirua biltzeko festa bat antolatzea erabaki genuen. Geroago pentsatu dugu jaietako grina pizteko eta maiatzeko festa iragartzeko modu bat izan zitekeela”, azaldu dute jai batzordekoek. Txanpontxo Egunaz gain, jai batzordeaz, auzotarren inplikazioaz eta Bidebietako jaietako berritasunez hitz egin dute kideek. Informazio guztia ostiraleko papereko edizioan egongo da irakurgai.