Uliako zuhaitzik berezienak erakutsiko dituzte asteburuan

Igandean hiru talde egingo dituzte: 10:00etan, 11:30ean eta 13:00etan.

Agurtzane Altuna

2016/04/14

Uliako ur-biltegietara bisita gidatua. (Argazkia: Agurtzane Altuna)

Martxoan hasi ziren Uliako mintegia eta bertako ur-biltegiak ezagutzeko urteko lehen bisita gidatuak egiten. Oso harrera ona izan zuten, eta berehala bete ziren hiru taldeak. Ikusmin horri erantzuteko igande honetan berriro errepikatuko dituzte bisita gidatuak. Oraingoan ere bizkor ibili da jendea, eta dagoeneko bete dituzte taldeak. 9:30ean, 11:00etan eta 12:30ean egingo dituzte parkea eta bertako bi ur-biltegiak ezagutzeko txangoak. Uliako Lore Baratzak proiektuko kideekin jarri behar da harremanetan jarduera hauetan parte hartzeko. Bisita gidatuez gain, goiz osoko plana izango da igandekoa: 8:30etik 10:00etara hegaztien behaketa egingo dute SEO-Donostiaren eskutik. Eta 10:30ean hileko auzolana egingo dute, parkea egokitzen jarraitzeko.

Zuhaitzak ere protagonista

Uliako Auzo Elkarteko kideak buru belarri dabiltza lanean mintegiak eta bertan garatzen diren proiektuak ezagutarazteko. Boluntarioki egiten duten lana da guztia, eta auzo elkarteko kide gehienek egiten dute txandaren bat. Joxe Arce uliatarrak, esaterako, asko daki zuhaitzen inguruan eta ondo ezagutzen ditu parkeko landareak. Horregatik, ur-biltegietara egingo dituzten bisitez gain, mintegietan ikus daitezkeen zuhaitz eta landareak ezagutzeko bisitak eskainiko ditu lehen aldiz Arcek. Kasu honetan, 10:00etan, 11:30ean eta 13:00etan egingo ditu, eta interesa duenak Ategorrieta aldeko sarrerara gerturatzea besterik ez du egin behar.

Harrera gune berria, prest

Uliako Lore Baratzak proiektuko kideen bulego gisa eta bisitarientzako harrera gune gisa erabiliko duten txokoa ere amaitu nahi dute asteburuan. Joan den larunbatean hasi zituzten lanak bio-eraikuntza tailer baten bidez, eta larunbat honetan, apirilak 16, egingo dute bigarren saioa. Ekian taldeak eskainiko du ikastaroa, eta lurra, hondarra eta lastoa nahastuz eraikuntza lanak nola egin daitezkeen erakutsiko dute. 9:30ean hasiko dira. Harrera gune berria ari da itxura hartzen pixkanaka. Begira bestela joan den larunbateko argazki hauei.