Belartzaren handitzearen aurkako mugimendua sortu dute Añorgan

Batzar irekia egingo dute herritarrek larunbatean, Errekatxulo babesteko deia eginez.

Estitxu Zabala

2016/04/22

Errekatxuloren bueltako bailara. (Argazkia: Errekatxulo Babestu)

Añorgako bizilagunak haserre daude, Belartza industriagunea zabaltzeko proiektua dela eta. Auzotarrak mugitzen hasi dira, Errekatxulo Babestu izeneko orria sortu dute Facebooken, eta dagoeneko bilera bat baino gehiago egin dituzte. “Poligonoa handitu nahi dute, mendiak txikituz. Proiektua oso aurreratua dago, eta sekulako txikizio naturala egingo dute, añorgatarron bizi ereduaren aurka”, dio bizilagunen kexak. Gainera, Donostiako Udalak proiektua ezkutuan daramala diote. Belartza 2 izeneko industriagunea ez eraikitzea da añorgatarren nahia. Horretarako, bihar, apirilak 23, larunbata, batzar irekia egingo dute, 10:30ean, Jolas Etxean.

Sinadura bilketa

Bizilagunen arabera, ehun urte baino gehiagoko haritzak eta 20 metro luzeko ehundaka zuhaitz botako dituzte proiektuaren baitan, besteak beste. Gainera, egungo baserrietatik 100 metrora, orain basoa dagoen lekuan, pabilioiak eraiki nahi dituztela salatu dute. Hori guztia kontuan izanik, sinadura bilketa bat ere egiten ari dira, change.org-ren bidez. Momentuz, 650 sinadura inguru bildu dituzte, eta 1.000ra iristea jarri dute helburu gisa.

Azken bideoak