AB Kroserako entrenamendu saioa antolatu dute

Probestu plazan elkartuko dira partaideak, elkar ezagutzeko.

Estitxu Zabala

2016/05/13

2015eko AB Krosaren irteera. (Argazkia: Estitxu Zabala)

Geroz eta gutxiago falta da III. AB Krosa iristeko! Maiatzaren 28an egingo dute euskararen aldeko Amara Berriko lasterketa, eta izena eman daiteke jada, Herrikrossa webgunean. Lasterketa iritsi bitartean, noski, lanean ari dira antolatzaileak. Hala, larunbat honetarako, maiatzak 14, entrenamendu saioa antolatu dute: AB Krosa ezagutu: entrenamendua guztiontzat! Helburua lasterketaren ibilbidea ezagutzea da. Aldi berean, lasterketan parte hartuko dutenek elkar ezagutzeko aukera izango dute, eta beldurra gainetik kentzea nahi dute. Probestu plazan elkartuko dira, 11:30ean. Animatu!

Lasterketa baino gehiago

Maiatzaren 28an, beraz, helduen lasterketa 19:00etan izango da. Aukeran egongo dira, iaz bezala, 3 kilometroko ibilbidea edo 6 kilometrokoa. Haurrek ere euren tartea izango dute; jolas gune bat prestatuko dute, 17:00etan, eta 18:00etan hasiko dute lasterketa. Korrika egiteko asmorik ez dutenek ere kontzertuez gozatzeko aukera izango dute, 20:00etan: Olatz Salvador eta Pelax eta Cowboys Orchestra. Euskarazko proiektu bati laguntza ematen diote urtero, lortutako diruarekin. Aurten, Donostiako Ttan Ttakun irrati librearentzat izango da saria.