Antiguako jaietarako buruhandiak egiten ari dira

Emaus Fundazioa eta Antiguotarrak dantza taldearen elkarlanari esker lortuko dituzte buruhandi berriak.

Nerea Lizarralde

2016/05/18

(Argazkia: Emaus Gizarte Fundazioa)

Emaus Fundazioaren Muntoko gizarte zentroko tailerretan enkargu berezi bat egiten ari dira. Antiguako jaietarako buruhandiak sortzen ari dira. Altzari zaharrak berriztatu, eta jantziak birziklatu ohi dituzte zentro honetan, eta oraingoan auzoko San Joan jaietako protagonista garrantzitsuenetakoak egiteko ardura izango dute. Antiguako jaien aspaldiko beharra da: buruhandi berriak. Egun dituztenak ez daude egoera onean, hautsita daude. Jakintza ikastolari, eta beste auzoetako jai batzordeei eskatuta konpondu izan dute arazoa, baina urte pare bat dira konponbide batean pentsatzen hasi zirenetik. Truke baten bidez lortuko dituzte buruhandi berriak. Antiguotarrak dantza taldea eta Emaus Fundazioaren elkarlanari esker. Irudi galeria honetan ikus daitezke sorkuntza prozesuaren lehen pausoak. Egiako Innovart19 dendaren jabea izan dute laguntzaile. Hiriko hainbat saltokitako pertsianetan horma irudi ederrak egin ditu.