Ontzi Museoak Kaia beste era batera ezagutzeko aukera eman du.
Arrain lonjaren historia kontatu die Jokin Gilisagastik bisitariei.(Argazkia: Estitxu Zabala)
Museoen Nazioarteko Eguna dela-eta, Donostiako museoek programazio berezia atondu dute aste honetarako.
Museoak eta Paisaia naturalak izenburupean,
Ontzi Museoak, esaterako, Kaia beste era batera ezagutzeko aukera eman du. Hainbat lagunek bat egin dute goizeko bisita gidatuarekin; hala,
Jokin Gilisagastiren eskutik ezagutu dituzte arrantzaleen kofradia, lonja eta bere arrantzontzia; eta
Aitor Buitronekin bisitatu dute Ontzi Museoko
Emakumeak eta itsasoa erakusketa.
Jokin Gilisagastik bazuen zer kontatu, izan ere, bera da Aquariumeko
Satanas bi ontziaren patroia, eta, aldi berean, Donostiako arrantzaleen kofradiako presidentea. Egun, Kaiko lonja ez da salmenta puntua; zehazki, 2012ko abenduan egin zuten bertan azken arrain salmenta. Garai batean, 40 ontzietako arrantza hustutzen zuten bertan, baina jarduera horrek behera egin zuen, ontzijabeak erretiratzen joan ziren heinean. Hori eta gehiago jakiteko aukera izan dute.
Horretaz gain, kontu gehiago ere prestatu dituzte. Arratsaldean, beste doako bisita gidatu bat programatua zuten, erakusketara; eta larunbatean, hirugarren bat, 12:15ean. Gainera, maiatzaren 27rako
ilustrazio tailerra prestatu dute, 17:00etatik 19:00etara, Elena Odriozolaren eskutik. Bera da
Emakumeak eta itsasoa erakusketako ilustrazioen egilea. Tailerrak 3 euroko prezioa izango du, eta aurrez izena eman behar da, 943 430 051 telefonora deituta edo
untzimuseoa3@gipuzkoa.eus posta elektronikora idatzita.
San Telmo, musikaz blai
San Telmo Museoak musikarekin lotu du Museoen Nazioarteko Eguna. Francisco Escudero Kontserbatorioarekin eta Udal Musika eta Dantza Eskolarekin elkarlanean aritu da. Gaur, 19:30ean, kontserbatorioko Itsaso Loinaz sopranoak eta Javier Perez de Azpeitia pianistak kontzertua eskainiko dute, museoko elizan. Maiatzaren 22an, 12:00etan, elizan, ballet garaikidea eta klasikoa eskainiko dituzte Musika eta Dantza Eskolako Eskolako ikasleek, Ana Remirok eta Maider Urrestarazuk gidatuta. Horrez gain, egun osoan zehar, kontserbatorioko ikasleek hainbat pieza eskainiko dituzte museoan barrena. Erakustareto bakoitzari dagokion gaiarekin lotuko dute jo beharreko errepertorioa. Maiatzaren 18an zein 22an museorako sarrera doan izango da.
