Txantxarrekako udako kultur egitaraua denon artean sortzeko deia egin dute
Larunbat arratsaldean egingo dute bilera, Antiguako gaztetxean.
«Agian guk ez dugu beti asmatzen jendeak nahi duena, eta pentsatzen dugu bilera ireki batean askotariko proposamenak atera daitezkeela. Afari-merienda baten bueltan ikusiko dugu auzoak zer eskatzen duen». Jon Agirre Txantxarrekako kideak apirilean IRUTXULOKO HITZAri azaldu zion udako kultur egitaraua denen artean osatu nahi zutela, eta horretarako bilera bat egingo zutela gaztetxean bertan. Larunbat honetan, maiatzaren 21ean, egingo dute, eta jendea parte hartzera animatu nahi dute, «denon artean gauzak askoz hobeto aterako lirateke».
Aurrera jarraitzeko herritarren parte hartzea nahi dute. Zer egin dezake Txantxarrekak? Zer behar du Antiguak? Zer nahi dute gazteek? Larunbat arratsaldean Txantxarreka gaztetxeko udako kultur eskaintza guztien artean eraiki eta erabakitzeko bilera egingo dute, pintxo eta lagun artean (19:00).
Joan den apirilean Txantxarrekaren aldeko pilota jaialdia egin zuten Antiguako frontoian. Gaztetxean azken hilabeteotan izandako lapurretetan galdutako materiala berreskuratzea zen helburua. Harrera bikaina izan zuen. 
