Aske utzi dituzte Gipuzkoa plazan atxilotutako bi lagunak

Ertzaintzak alde egin du gunetik eta arratsaldeko asanblada prestatzeari ekin diote.

Malen Aldalur

2016/06/02

Gipuzkoa plazan zeuden bi lagun eraman ditu Ertzaintzak

Bi pertsona eraman dituzten unea (Argazkia: @alauzurika)

Ertzaintzak Gipuzkoa plazan zeuden bi lagun atxilotu dituela jakinarazi du Gipuzkoa Zutik mugimenduak sare sozialetan. Azaldu dute 50 Ertzain inguru hurbildu direla ostegun goizean Gipuzkoa plazara. Erraustegiaren eta elite politiko-ekonomikoen aurka bertan bildutakoak lurrean eseri eta “hemen gaude bizitzaren alde” eta “errausketarik ez” bezalako aldarrikapenak egiten zituzten bitartean. Eraman dituzten bi lagunak polizia autoan sartu dituzte. Plazan zeudenek baieztatu dutenez, atxilotu egin ditu Ertzaintzak, eta handik ordu gutxira aske utzi dituzte. Plaza hartu dute berriz Gipuzkoa plaza hartu dute berriro. Asteazken goizean udaltzainek plaza hustu ondoren, Bulebarreko kioskoa “okupatu” zuten Gipuzkoa Zutikeko kideek. Arratsaldeko 18:30etarako deitu zuten mobilizazioa Gipuzkoa Plazatik eta ehunka lagun inguru batu ziren. Asanblada baten ostean Gipuzkoa plazara bueltatzea erabaki zuten. Ertzaintza bidea oztopatzen saiatu arren, manifestazioak aldundiaren aurrera heltzea lortu zuen, eta bertan geratu ziren ehunka pertsona. Bertan pasa dute hirugarren gaua. Erraustegiaren aurkako mobilizazioen jarraipena egiten ari da IRUTXULOKO HITZA.