"Gutxi batzuen interesak defendatzen dituztenen aurka" aldundia eta kutxa inguratu ditu Gipuzkoa Zutikek

Bulebarrean kanpatuta jarraitzen du mugimenduak eta datozen egunetarako egitarau oparoa prestatu dute.

Malen Aldalur

2016/06/10

"Gutxi batzuen interesak defendatzen dituztenen aurka" aldundia eta kutxa inguratu ditu Gipuzkoa Zutikek

Giza kate baten bidez aldundia eta kutxa inguratu dituzte. (Argazkia: Malen Aldalur)

Elkarri eskutik helduta egin dute Bulebarretik Gipuzkoa Plazara bidea eta hainbat lagunen artean aldundia inguratu dute, bi aldiz. Gipuzkoa Zutikek azaldu duenez, “gutxi batzuen interesak defendatzen dituztenen aurka eta bizitzaren alde” daudelako egin dute ekintza. Egitasmoa aurrera nola eraman erabakitzeko, asanblada egin dute 19:00etan. Aurretik, 17:00etan Zigor Etxabururen hitzaldia egongo da: “Aldundi honen plana neoliberalismoa eta euskara” eta 18:00etan borroken bateratzea egin dute. Maiatzaren 29an abiatu zuten mugimendua eta bizirik jarraitzen du oraindik. Bulebarrean kanpatuta daude eta egunero egitarau oparoa antolatzen dute: kontzertuak, hitzaldiak, ekintzak eta mobilizazioak, besteak beste. Asteburu indartsua dute aurretik. Larunbatean, performancea egingo dute 10:00etan; 10:30etan eta 12:30etan solasaldiak, “Herri mugimenduak eta musika eszena” eta “Herri mugimenduak eta kultura eszenak musikatik harago”; 18:00etan borroken bateratzea, ondoren, asanblada; eta egunarekin amaitzeko gaueko martxa. Igandean, berriz, “Eslogan politikoak eta poetikoak” ikastaroa antolatu dute Koldo Izagirrerekin; 18:00etan lurralde antolaketaren inguruko hitzaldia DOT Desazkundea taldeko lagunekin, ondoren, asanblada; 20:00etan borroken bateratzea, eta 22:00etan Revival. Erraustegiaren aurkako mobilizazioen jarraipena egiten ari da IRUTXULOKO HITZA.