Emakumezkoen zortzi traineru lehiatuko dira Kontxako Banderan

Arraun Lagunaken ontziak lekua ziurtatua izango du, hiriko bakarra izateagatik.

Estitxu Zabala

2016/06/21

Batelerak, bandera astintzen, iaz. (Argazkia: Lide Ferreira)

Aurtengo Kontxako Banderaren oinarriak zabaldu ditu Donostia Kulturak, udalaren ordezkari gisa. Gizonezkoen Banderan ez da aldaketa nabarmenik egongo; baina Emakumeen IX. Kontxako Banderan, lehen aldiz, zortzi traineruk izango dute lekua; bi txandatan. Azken urteetan, emakumezkoen lau traineru lehiatu dira iraileko lehenengo bi igandeetan, eta gizonezkoen zortzi. Sailkatze estropadak irailaren 1ean jokatuko dituzte, 17:30ean, ohikoa den bezala; lehenengo emakumezkoek, eta, ondoren, gizonezkoek. Ondoren, irailaren 4an eta 11an izango dira igandeeetako estropadak; 11:00etan emakumeenak, eta, 12:00etan, gizonezkoenak.

Arraun Lagunakek, txartel zuzena

Donostiako Udalak Donostiarra traineru bateratua babesten duela dio. Hala, hiria klub horren traineruek ordezkatuko dutela. Beraz, araudiaren arabera, gizonezkoekin gertatzen den moduan, igandeetarako txartel zuzena izango du Donostiarraren emakumeen traineruak. Momentuz, ordea, Donostiarrak ez du emakumeen trainerurik. Beraz, Arraun Lagunaken ontziak lekua izango du zuzenean, sailkatze estropada jokatu gabe. Araudiak dioenez, emakumezkoen traineru bat baino gehiago baleude hirian, traineru horien artean sailkatze estropada bat jokatu beharko lukete, abuztuaren 19an, 19:00etan. Garai batean gizonezkoen hiriko traineruekin hala egiten zuten.