(Bideoa) Kanta eta dantza izan dira nagusi Antiguako San Joan bezperan

Jende andana hurbildu zen Gaskonia plazara, auzoko jaien azken eguna festa giroan ospatzeko.

Lide Ferreira

2016/06/24

Bart eman zieten amaiera Antiguako San Joan jaiei, festa giro bikainean. Izan ere, arratsaldetik egon zen aukera hainbat jarduerez gozatzeko: Matia kalean, buruhandi eta trikitilariak ibili ziren; Platero tabernan, Antiguakoentzako luntxa eskaini zuten; eta auzoan zehar kantujira ibili zen. Iluntzean, 22:00ak aldera, Gaskonia plazan ezarritako suaren inguruan hainbat dantzarik eskaini zuten euren emanaldia, eta koroak ere abestu zuen. Hala, gutxinaka piztu zuten sua, eta gerturatu ziren auzotarrek euren paper zahar guztiak erre ez ezik, loreak ere bota zituzten sutara. Sua itzaltzen joan zen bitartean, erromeria izan zen nagusi plazan, Amaia Arza eta Leire Zumetaren musikari esker. Antiguakoek euskal dantza badakitela erakutsi zuten, eta halaxe aritu ziren berandu arte.