Dbus-en autobusen laurdena elektrikoak eta hibridoak izango dira

26-Amara-Martutene lineak bi autobus %100 elektriko eta bi hibrido izango ditu bihartik aurrera.

Lide Ferreira

2016/07/05

Dbus-eko autobus elektriko bat. (Argazkia: Lide Ferreira)

Urumearen ibai ertzetik igarotzen den 25-Amara-Martutene lineako autobusak berrituko ditu Dbus konpainiak. Izan ere, bihartik aurrera, bide hori bi autobus %100 elektrikok eta beste bi hibribok egingo dute. Lau autobus berri horiekin eta urte amaiera bitarte jarriko dituztenekin Dbus-en autobusen laurdena hibrido eta elektrikoak izatea lortuko dute. Honela, zaratarik gabeko eta emisio kutsatzailerik igortzen ez duen garraio publikoa bultzatu nahi dute. Aurreikusten dute emisio kutsatzaileen igorpena %65 murriztea. Berritasun gisa, ibilgailu berriek USB kargagailuak dituzte, bidaian zehar gailu elektrinikoak doan kargatu ahal izateko. Bi autobus %100 elektriko berriek 12 metroko luzera dute, eta energiaren erabilera optimizatzeko helburuarekin diseinatu dira. Beste ezaugarri batzuen artean, ibilgailuak geldiarazten direnean, sortzen den energia berreskuratu eta energia elektriko bihurtzen dute, baterien autonomia handituta. Gainera, Dbus Hiri Berdea kanpainaren barruan, iraunkortasuna eta ingurumena errespetatzearen alde egiten du konpainiak, eta horixe islatu nahi izan dute ibilgailuaren barruko diseinuarekin. Hain zuzen ere, hainbat elementu berdeak dira.

%25-30 erregai gutxiago kontsumituko dute

Autobus hibrido berriak, berriz, Start-Stop sistema berria dute; beraz, gelditzen direnean, modu elektrikoan baino ez dute funtzionatzen, eta ez dute gasik igortzen, ez eta ingurunean kutsadura akustikorik sortu ere. Horrek dakarrena da %25-30 erregai gutxiago kontsumitzea, besteak beste. Horietaz gain, beste lau autobus hibrido gehiago jarriko ditu abian Dbus-ek hiriko beste lineatan. Hala, urte amaierarako mota horretako 20 ibilgailu izango ditu. Horrela, 12 metroko autobusen %25 elektrikoak eta hibridoak izango dira.