Jurgi Ekizak Txantxarrekan joko du uztailaren 31n
'Igande ahaztezinak' izenburupean bi emanaldi prestatu dituzte Antiguako gaztetxean.
Jurgi ekizaren kontzertu akustiko bat eta Kuban sentiaraziko zaituen musika festa eder bat. Horiexek dira Antiguako Txantxarreka gaztetxeak, hurrenez hurren, uztailaren 31rako eta abuztuaren 7rako dituen proposamenak. Igande ahaztezinak izenburupean, udako igande arratsaldeak girotzera eta proposamen erakargarri bat eskaintzera dator Txantxarrekaren programa berezia.
Jurgi Ekizak Antiguan estreinatu zuen zuzenean bere lehen bakarkako lana. Orain auzoko gaztetxean gozatu ahal izango dute musika zaleek Willis Drummondeko abeslari eta gitarristaren abesti intimoenez.
D’Capricho talde kubatarrak Karibeko irlara eramango zaitu euren musika eta erritmo biziarekin. Zuzeneko musikarekin festa giroaz alaituko dute gaztetxea. Gainera, mojitoak prestatuko dituzte.
Bi emanaldietarako sarrerak 3 eurotan eskuratu ahal izango dira, egunean bertan. Eta ordutegi bera izango dute, 19:00etan hasiko dira bi ekitaldiak.
