Kaia kolorez jantzi dute Donostiako Piratek

Ezkila eta Matti iritsi dira kaira eta txupinazoarekin eman diote hasiera Aste Nagusi Piratari.

Malen Aldalur

2016/08/13

Kaia kolorez jantzi dute Donostiako Piratek

Jai giroan hasi dute Aste Nagusia. (Argazkia: Malen Aldalur)

Aingura, Eskifaia, Filibusteroak, Kalepoza, Pirata Bihurriak, Sardiñerak, Traganarrua, Ubarroiak, Xibaroak, Jaraneroak eta Eskandalosa. Kofradia guztiak elkartu dira gaur arratsaldean Donostiako Piraten Aste Nagusiari hasiera ofiziala emateko. Kofradia bakoitza leku batetik abiatu da, eta gutxinaka-gutxinaka denak biltzen joan dira, Parte Zaharreko eta Erdialdeko kaleetan. Denek batera, Kaiko bidea hartu dute, eta Ezkila eta Mattiri ongietorria eman diote. Matti pertsonaia urtero ideia edo balore ezberdin bat ordezkatzen du, lehengo urtean IRUTXULOKO HITZA izan zen Matti; eta oraingoan bi errefuxiatu izan dira; Hassana eta Katherina. Piraten mugimenduak azaldu du ezin diola “bizkarra eman” azken aldian “hainbeste hildako eragiten ari den dramari”: “Europar Batasuneko agintari politikoak modu lotsagarrian jokatzen ari direla uste dugu, eta gudatik eta pobreziatik ihesean ari denari ezin zaiola hesirik jarri. Are gehiago, beren herrialdeak hankaz gora jarri dituztenak Mendebaldeko potentziak direnean”. Euskaraz hitz egin dute biek. Euren egoera salatu eta esker ona adierazi diete piratei. Bestalde, urtero kofradia desberdin batek hartzen du Ezkilaren ardura, eta aurtengo Aste Nagusian Aingura kofradiari egokitu zaio Ezkila kapitainaren pertsonaia. Honela bada, Donostiako Piraten Aste Nagusiari hasiera eman diete, festa ziurtatua dago.