Piratak hasi dira Donostia abordatzeko prestatzen

Irutxuloko Hitza

2016/08/15

Piratak hasi dira Donostia abordatzeko prestatzen

Goiza lanean pasa dute piratek. (Argazkia: Malen Aldalur)

Goizeko 05:00etarako joan dira lehen piratak txaleko horiak soinean zituztela kaira. Goizeko 07:00etarako txaleko horiz bete dira portuko ranpa eta inguruak. Dena prest zuten jendea iristen hasten zenerako. Azkeneko hasteetan Donostiako Piraten webgunearen bitartez hainbatek eman dute izena taldeka abordaian parte hartzeko. Goizeko 08:00etatik txandaka ordu eta erdi izan du kuadrilla bakoitzak bere balsa prestatzeko. Jo eta su lanean aritu dira. Batzuek lehenengo urtea zuten aurtengoa, Petximontxo koadrillak esaterako aurten lehenengoz abordatuko du hiria. Kuadrillako kamisetekin dotore eta prest zeuden festaren parte bihurtzeko. Beste batzuk aldiz, urte mordoa daramatzate abordaian parte hartzen. Oreretako kuadrilla handi bat adibidez, urtero etortzen da: “Aurten Donostia abordatzen dugun hamahirugarren aldia da”. Hassanna Aalia eta Kateryna Kirsanova ere bertan izan dira. Matti irudikatu dute aurten errefuxiatu sahararrak eta ukraniarrak. Lan eta lan dabiltza piratak. Izan ere, batzuk abordaian parte hartzeko balsak muntatzen dituzte bitartean lanean ari dira beste batzuk. “Goizeko 07:00etatik gaude hemen, super turnoa egitea egokitu zaigu, baina lagun artean ondo ari gara pasatzen”, azaldu du Lide Monterok. Dena prest eduki nahi dute arratsaldeko 17:00etarako. Izan ere, aurten hamalaugarren aldiz abordatuko dute Donostia, “espazio publikoa denena dela aldarrikatzeko”.