Korrika egiteko garaia iritsi da

Hiru Hondartzetako Krosa jokatuko dute urriaren 9an, herri lasterketen egutegiari hasiera emateko.

Estitxu Zabala

2016/09/30

Hiru hondartzetako krosaren aurkezpena egin dute udaletxean. (Argazkia: Estitxu Zabala)

Udazkenarekin batera irekitzen da urtero herri lasterketen egutegia. Hiru Hondartzetako Krosa izango da irteteko pistola-tiroa botako duena, urriaren 9an, 10:00etan, eta atzetik etorriko dira gainontzeko guztiak. Jon San Sebastian Jakintza Atletismo Klubeko kideak azaldu duenez, lasterketa erakargarria da, eta iazko 3.300 lagun inguruko partaidetza mantentzea espero dute. Gainera, pozik daude emakumeen partaidetzarekin, %34aren bueltan ibiltzen baita. Edonola, izen ematea zabalik dago oraindik, Kirolprobak.com webgunean. Korrikalariek 10 kilometro inguruko ibilbidea egin beharko dute, eta irteera eta helmuga Ondarreta hondartzaren ondoan izango dituzte.

Dortsal solidarioa

Berritasun gisa, dortsal solidarioa sortu dute aurtengo lehiarako. Partaideek nahikoa izango dute 13 euroren ordez 14 euro ordaintzea, izen ematea egiterakoan. Horrela, korrikalari bakoitzak jarritako euro hori Rotary Club San Sebastian taldearentzat izango da, Zure irrifarra gure oparia proiektua babesteko. Gaixo dagoen haur bati laguntza emango diote, Espektro autismo trastornoa baitu. Saioa izena du, eta bildutako diruarekin txakur bat izango du, bere bizitza kalitatea hobetzen laguntzeko.