Kontuz!, harriak mugitzen ari dira Loiolan

Agurtzane Altuna

2016/10/20

Latsariak izango dira protagonista Herri akzioa dinamikak egindako bigarren filmean. (Argazkia: Herri Akzioa)

1916. urtean Mari Kristina Austriakoa erreginak Loiolako Lorategi Hiriko lehen harria jarri zuen. Ordutik askotan goratu dira Urumeako urak, baina auzoa birmoldatzeko lanak amaitu gabe daude oraindik. Loiola existe, lanak bukatu lelopean 1916. urteko bisita hura antzeztu zuten iaz auzotarrek film bat osatuz. 100 urte bete dira aurten lehen harri hura jarri zutenetik, eta urteurren biribila probestuz filmaren bigarren zatia grabatu du Herri Akzioak: Harriak; bihar aurkeztuko dute kultur etxean, 20:30ean. Latsariak izango dira oraingoan protagonista. Lehen harri hura lurpetik atera eta udaletxera eramango dute protesta gisa, eta etxerako bueltan lapurreta txiki bat ere egingo dute, dagokiena bere eginez.