Sonido Vegetal, Physis Versus Nomos, Txemak eta DJ Miau izango dira Kortxoenearen aldeko jaialdian
Groseko Kortxoenea gaztetxea eraitsi zutenetik urtebete igaroko da laster, azaroaren 3an. Astebete lehenago, urriaren 28an, ostirala, musika jaialdi bat egingo dute Dokan, eta bertan bildutako dirua Kortxoenearen auziak eragindako gastuak ordaintzera bideratuko dute. Beñat Antxustegi –Physis Versus Nomos– musikariarekin hasiko da jaialdia, 21:00ak inguruan. Andaluziatik Sonido Vegetal taldea etorriko da, doinu dantzagarriekin eta fusio musikarekin festa girotzeko. Donostiako Txemak taldea ere ariko da zuzenean jotzen. Jaialdia DJ Miau-ren musika saioarekin bukatuko da. Sarrerak 5 euroren truke eskuratu ahal izango dira.
Azaroaren 3an, Katalunia plazan
Dokako jaialdiaz gain, urtemugaren egunean, azaroaren 3an, Groseko Katalunia plazan hainbat jarduera egingo dituzte. Gaztetxean biltzen ziren hainbat kolektibok parte hartuko dute, tartean Urban 13 taldeak. Break tailer bat egingo dute, rapaz gozatzeko aukera izango da eta kantautore bat ere ariko da zuzenean. «Ez dugu eraikinik, baina kalea badugu. Kortxoenean egiten ziren gauza horiek guztiak erakutsiko ditugu, aldarrikapen gisa», azaldu dute. Kortxoenea gaztetxearen auzia Groseko gaztetxeko kideak bortizki bota eta eraikina eraitsi zutenetik ia urtebete igaro da, eta auziak oraindik epaitegian dirau. Prozesu judizialari buruzko xehetasun guztiak eman genituen joan den astean, Konpondu gabeko auzia erreportajean.
