Pintxoaren munduan egindako lanagatik sarituko dute Jose Ramon Elizondo

Euskal Herriko Pintxo Txapelketaren XI. ekitaldian eskainiko diote aitortza, asteazkenean.

Lide Ferreira

2016/10/24

Aloña Berri tabernako Jose Ramon Elizondo, bere emazte Conchita Bereziartuarekin batera. (Argazkia: Hondarribiako Ostalaritza elkartea)

Hondarribiako Ostalaritza Elkartearen ekimenez, egun itxita dagoen Groseko Aloña Berri tabernako Jose Ramon Elizondo sarituko dute asteazkenean, Euskal Herriko Pintxo Txapelketaren XI. edizioan. Aitortu nahi dute pintxoaren munduan egin duen lana eta lortutako erreferentzialtasuna. Elizondo Oñatikoa den arren, 9 urterekin Donostiara etorri zen bizitzera, eta berehala hasi zuen bere ibilbidea ostalaritzan, gurasoek kudeatzen zuten Beti Jai taberna. Ondoren, Aloña tabernaren jaiotza ikusi zuen; eta, 1986an, Aloña Berri taberna sortu zuen, bere emazte Conchita Bereziartuarekin batera. Jaso zituen sarian artean daude: Espainiako pintxoen taberna onenaren Gourmetour saria, Valladolideko txapelketaren lehen saria eta Gipuzkoako txapelketarena.

Txapelketa Donostiara

Euskal Herriko Pintxo Txapelketa Hondarribian egin izan ohi da. Aurten, ordea, hirira ekarriko dute XI. ekitaldia, Donostia 2016 Kultur Hiribututza dela eta. Hala, gaur, bihar eta etzi (urriak 24-25-26) egingo dute, Kursaalen. Sarrera doakoa da eta edonor joan daiteke pintxoak nola prestatzen dituzten ikustera. Gipuzkoako Kultura eta Turismo Diputatu Denis Itxasoren arabera, txapelketak pintxoaren kulturari balioa ematen dio. Hiru eguneko lehiaketa izango da txapelketa, eta Euskal Herriko 80 sukaldari arituko dira pintxoak prestatzen. Lehiatzen direnek, baina, ez dute bide erreza izango, eta arau zorrotzak jarraitu beharko dute; tartean bi edo hiru hozkadatan kontsumitzen den elaborazio gastronomikoa izan behar duela nabarmendu dute antolatzaileek.

Hamar sukaldari, txapelaren lehian

Sukaldariek prestatutakoa hiru epaimahaien aurrean aurkeztu beharko dute, azken fasera pasa aurretik. Hala, astelehenean eta astearte goizean egingo dituzte lehen sailkapen saioak. Saio horietako bakoitzetik zazpi pintxo hautatuko dituzte, eta horien egileak astearte arratsaldeko finalerdira pasatuko dira. Handik irtengo dira txapelaren lehian ariko diren hamar sukaldariak. Epaimahaiaren buru Raul Ballam sukaldari kataluniarra izango da. Jatetxe askotan ibilia da, baina, 2009az geroztik, Bartzelonako Mandarin Oriental hoteleko Moments jatetxearen jabe da, Carme Ruscadell amarekin batera. Jatetxea ireki eta urtebetera, lehen Michelin izarra jaso zuen Ballamek, eta, 2012an, bigarrena. Txapelketako sari nagusiak ere Amstel garagardo etxearen izena eramango du. Pintxorik onenaren egileak 3.000 euro, txapela eta Ramon Rotetak eginiko eskultura bat jasoko ditu. Bigarren sailkatuak 2.000 euro eta diploma jasoko ditu; eta hirugarrenak, 3.000 euro eta diploma. EUSKAL HERRIKO XI. PINTXO TXAPELKETA Urriak 24, astelehena

10:00-13:00. Sailkatze saioa.
16:00-19:00. Sailkatze saioa.

Urriak 25, asteartea

10:00-13:00. Sailkatze saioa.
16:00-19:00. Finalerdia.

Urriak 26, asteazkena

9:00-11:00. Finala.
11:30. Sari banaketa.