2017ko Olatu Talkarako proposamenak aurkezteko epea zabaldu dute

Malen Aldalur

2016/12/13

Aurtengo Olatu Talka jaialdiko aurkezpena. (Argazkia: Estitxu Zabala)

Gaur hasi eta 2017ko urtarrilaren 31ra arte egongo da zabalik datorren urteko Olatu Talkarako proposamenak aurkezteko epea. Maiatzaren 19an, 20an eta 21an ospatuko da zortzigarren Olatu Talka jaialdia, eta artista, kolektibo, elkarte eta hiritarrek izango dute parte hartzeko aukera. 2010. urtean egin zen lehenengoz Olatu Talka jaialdia Donostia 2016 egitasmoa, oraindik, hautagaitza fasean zegoenean. Antolatzaileek azaldu dute dagoeneko Olatu Talka jaialdia, Hiriburutza eta Elkarbizitzarako Kulturan oinarritutako proiektuaren “DNAren parte” dela. Bestalde, azaldu dute Olatu Talkan azpimarratu beharreko beste ezaugarrietako bat gauzak beste modu batean, beste formatu batzuetan eta leku berrietan egitea dela: “Horrela, jaialdia hainbat ekimenen berrikuntzarako mintegi bizia da”. Aurreko bi urteetako trantsizioaren ondoren, lehenengo aldiz antolakuntzaren ardura Donostia Kulturak bakarrik hartuko du. Izen ematea www.olatutalka.eus webgunearen bitartez egin behar da. Proposamenetan hainbat gai jorratu daitezke: jarduera artistiko guztiez gain, gizarte gaiak, zientzia dibulgazioa, ingurumena, hirigintza, diseinua… Bestalde, jakinarazi dute aurrerago beste deialdi batzuk egingo dituztela egitasmo zehatz edo plataforma desberdinetan eragile bezala izen emateko.