Mugak gainditzen dituen erakusketa zabaldu dute Ontzi Museoan

Urtarrilaren 15a arte egongo da ikusgai.

Agurtzane Altuna

2016/12/13

‘Itsasotik, itsasora’ erakusketako margolan bat. (Argazkia: Agurtzane Altuna)

Itsasotik, itsasora da Ontzi Museoan zabaldu duten erakusketaren izena. Hiru urteko lanaren emaitza da, hiru urte baitaramatza museoak Atzegirekin elkarlanean. Adimen urriko pertsonen aldeko Gipuzkoako elkartea da Atzegi, eta beste museo eta sortzaileengana jo duten moduan, sarritan joan dira Ontzi Museora. Bertako erakusketak ikusi, behatu, aztertu eta kritiko izaten ikasi dute; gustatzen zaiena eta gustatzen ez zaiena identifikatzen. Hiru urtez euren ahalmena garatzen joan dira, eta ikusi duten guztiak sortutako emozioak islatu dituzte artearen bidez. Hainbat margolan egin dituzte. “Ikuspegia aldatu da, eta Ontzi Museoaren erabiltzaile izatetik, artista izatera pasa dira”, esan du Soco Romano, museoko zuzendariak. Atzegik hartu badu ere erakusketan parte hartu duten taldeen gidaritza beste asko izan dira parte hartzaileak: Plus 55, Gautena, Agifes, Gielmar, Gurutze Gorria eta Atece, besteak beste. Hauez gain, arte ikasleek eta ospe handiko artistek ere parte hartu dute erakusketan. Urtarrilaren 15a arte egongo da erakusketa ikusgai. Hortaz gain, beste hainbat jarduera ere antolatu dituzte, museoko webgunean dituzue guztiak ikusgai.

Azken bideoak