San Tomas Txiki eguna ospatuko dute larunbatean Morlansen
Auzo elkarteak deia egin du hurbiltzen diren guztiak baserritarrez jantzita joan daitezen.
Urtero bezala, San Tomas Txiki eguna ospatuko dute Morlansen. Aurten, larunbatean (hilaren 17an) egingo dute, Leire plazan. Auzo elkartekoek deia egin dute hurbiltzen diren guztiak baserritarrez jantzita joan daitezen.
11:00etatik aurrera, txorimaloak egingo dituzte haurrek. “Jendeak etxetik arropak ekartzen ditu, eta guk txorimaloaren buruak eramaten ditugu, umeek margotu ditzaten”, azaldu dute Morlanstarrak auzo elkartekoek.
Taloak egingo dituzte Morlanskoek
Aldi berean, txozna bat jarriko dute plazan, eta bertan jatekoa zein edatekoa egongo da. Berritasun gisa, taloak egingo dituzte auzotarrek beraiek: “Ataungo talogileekin egon gara asteburuan, eta nolabaiteko ikastaro azkar bat eman digute taloak egiten ikasteko. Ea zer moduz ateratzen zaigun!”. 13:00etatik aurrera, berriz, plaza dantzak izango dira nagusi. Urtean zehar euskal dantza ikastaroan dabiltzatenek izango dute aukera euren ezagutzak erakusteko.Auzoko egutegia
Urtea amaitzen ari den honetan, 2017ari begira jarri dira Morlanskoak. Izan ere, auzoko egutegi bat prestatu dute, hilabetero Morlansen egiten dituzten jarduerekin. Euren asmoa da San Tomas Txiki egunean, abenduaren 17an, salgai jartzea egutegia. Beraz, nahi duen orok badaki noiz eskuratu, Leire plazan bertan.
