Kresalaren konpartsa igande honetan ibiliko da Parte Zaharreko kaleetan barrena.
Inude eta Artzainen konpartsa. (Argazkia: Lide Ferreira)
Kresala Elkarteak antolatzen du urtero Inude eta Artzainen Konpartsa, Parte Zaharrean. Aurten, otsailaren 5ean, igandean, aterako dira kalera, 12:00etan. Euskal Herria kalean hasi eta bukatuko dute desfilea, eta kale hauek igaroko dituzte: Aldamar, Bulebarra, Nagusia, Abuztuaren 31, Narrika, Iñigo, Konstituzio plaza, Arraindegia, San Juan, Bretxa, eta Aldamar. Tartean, geldialdia egingo dute Kostituzio plazan, bertan antzezpena eskaintzeko.
Guztira, 150 lagunek osatzen dute konpartsa. Horietatik 60 dantzariak dira, eta, beste 60, danborrariak; gainontzekoak, pertsonaiak dira: alkatea eta emaztea, idazkaria, gotzaina, apaiza, meza laguntzaileak, mikeleteak, barkilleroak, bota gabiltzailea, lorazaina… The Joselontxos txarangaren laguntzarekin ibiliko dira guztiak ere.
Artzain eta Inudeen errepertorio ia osoa Raimundo Sarriegi maisuak konposatutakoa da:
Inudeen konpartsa, Sarrera eta
inudeen eszena, Festarik behar bada… kantu horiek danborrekin laguntzeko oso aproposak direnez, Kresala elkarteak danborrari talde bat prestatu zuen konpartsari laguntzeko.
Gros, Amara Berri eta Antiguan ere bai
Kresalaren konpartsaz gain, beste hiru auzotan ere egingo dute Inude eta Artzainen jaia: Gros, Amara eta Antigua.
Grosen, jaia antolatzeaz arduratzen da Artaiñu, Groseko Artzain eta Inudeak Konpartsa. Horiek ere igande honetan irtengo dira, otsailaren 5ean, 11:15etik 14:30era. Txofre plazan hasiko dute ibilbidea, eta Artetxe Jeneralean bukatuko dute.
Amaran, Ikasbide Guraso Elkarteak du konpartsaren ardura. Otsailaren 12an irtengo dira, 11:30etik 14:00etara. Loiolako Erriberako Ikasbide ikastolan hasiko dute ibilbidea, eta Amara Berriko Probestu plazan bukatuko dute.
Antiguotarrak dantza taldeak otsailaren 25era atzeratu du ospakizuna.
Antiguako merkatu zaharrean egingo dute irteera, eta Matia kalea zeharkatuko dute. Arantzazuko Ama auzunean egingo dute bukaera.
