Elkartasunezko kafeak prestatuko dituzte martxoaren 24an
Siriarako Pasaporteak elkartearen ekimenez, errefuxiatuak laguntzeko jarduera berri bat antolatu dute. #Siriarakokafea izenburupean, martxoaren 24an, Donostiako kafetegi batzuetan erosten den kafearen kopuru bat errefuxiatuentzako izango da. Edariek 2,5 euro balioko dute, eta bildutako dirua Atenasko City Plaza ostaturako erabiliko dute.
Hauek izango dira #Siriarakokafea jardueran parte hartuko duten kafetegiak:
- Art & Cakes (Federico Garcia Lorca, 10)
- La casita de caramelo (Pedro Egaña, 6)
- Meyvi (Galtzada Nagusia, 19)
- Hogar dulce hogar (Zabaleta / Bermingham)
- Taba (Tabakalera)
- La hora del café (Kalkutako Teresa, 1)
- LekuOna (Atotxa)
City Plaza ostatua
Siriarako Pasaporteak elkarteak City Plaza proiektuarekin elkarlanean aritzen da, Atenasen. Siria, Irak, Pakistan, Iran eta Afganistanetik etorritako 400 lagun, ia erdia umeak, “duintasunez bizi dira” Greziako hiriburuko erdialdean kokatuta dagoen hotel horretan. Hura duela urte batzuk itxi egin zen, Grezia jipoitu duen krisi ekonomikoak bultzatuta. 2016ko apirilean, aktibista talde batek hotela okupatu zuen eta gaurko egunean, boluntarioek eta errefuxiatuek beraiek kudeatutako proiektu bat da. Autogestioa (errefuxiatuek aktiboki parte hartzen dute erabakiak hartzerakoan, eginkizunen garapenean eta jardueretan) eta errespetua (ez dago borrokarako lekurik ez eta emakumeei eta haurrei tratu txarrak emateko ere) gune horren berezko ezaugarrietako bi dira.
